Xalq deputatlari Zomin tuman Kengashi deputati Y.Safarov tomonidan hududdagi Bog‘ishamol mahallasida sayyor qabul tashkil etildi. Mazkur uchrashuvdan ko‘zlangan asosiy maqsad fuqarolarning muammo va takliflarini bevosita joyiga chiqqan holda o‘rganish, ularni qiynayotgan masalalarga amaliy yechim topishdan iborat bo‘ldi.

Sayyor qabulda tuman Kengasi deputati S.Bekmurodova, “mahalla ettiligi” ishtirok etdi. Ochiq muloqot tarzida o‘tgan uchrashuv davomida aholi tomonidan ichimlik suvi va elektr ta’minoti, tadbirkorlik faoliyatini boshlash uchun ko‘mak berish kabi qator masalalar ko‘tarildi.

Deputat har bir murojaatni batafsil tinglab, ayrim masalalar yuzasidan mas’ul tashkilotlarga aniq topshiriqlar berdi. Qo‘shimcha o‘rganish va vaqt talab qiladigan masalalar esa tegishli tartibda nazoratga olinib, ijrosi bo‘yicha muddatlar belgilandi.