2026-yil 5-fevral kuni Parkent tumanidagi Novdak, Nevich, Yangisanganak, Shanpan va Obod mahallalarida ajrimlarning oldini olishga qaratilgan keng qamrovli yarashtirish tadbiri o‘tkazildi. Mazkur tadbirda mahalla raislari, xotin-qizlar faollari, “Oqila ayollar” harakati a’zolari, Parkent tumani Ichki ishlar bo‘limi xodimi katta leytenant N.A. Maxkamboeva, shuningdek nuroniylar ishtirok etdilar. Tadbirda tuman Kengash deputati Yoqubova Xusnora Abduxamidovna so‘zga chiqib, ajrim yoqasidagi va notinch oilalar bilan olib borilayotgan tizimli ishlar, hududda jinoyatchilikka qarshi kurashish holati, xususan “qizil” va “sariq” toifadagi hududlarda jinoyatchilikni kamaytirish borasida amalga oshirilayotgan amaliy chora-tadbirlar haqida o‘z fikr-mulohazalarini bildirdi. Ayniqsa, ajrim yoqasida turgan oilalar bilan alohida suhbatlar tashkil etilib, ularga farzandlar kelajagi va taqdiri, oiladagi nizolarni tinch yo‘l bilan hal etish, o‘zaro hurmat, mehr-muhabbat hamda sabr-toqatning ahamiyati haqida batafsil tushuntirishlar berildi. Tadbir yakunida mahallalardan ishtirok etgan oilalarga yarashish va o‘zaro kelishuvga erishishlari uchun muhlat berildi. Ushbu uchrashuv oilaviy totuvlikni mustahkamlash, ajrimlarning oldini olish hamda jamiyatda sog‘lom ma’naviy muhitni shakllantirishga xizmat qilishi ta’kidlandi.