Deputatlar oilaviy poliklinikalardagi qurilish va ta’mirlash ishlarini o‘rgandilar 

2025 yilning 7 may kuni O‘zbekiston Respublikasi Prezidenti Shavkat Mirziyoev raisligida sog‘liqni
saqlash tizimini yanada takomillashtirish masalalariga bag‘ishlab o‘tkazilgan kengaytirilgan
yig‘ilishda belgilangan vazifalar, xususan, “90 kunlik o‘zgarishlar vaqti” doirasida
belgilab berilgan topshiriqlar ijrosini ta’minlash bo‘yicha tumanda bir qator ishlar
amalga oshirilgan.  

Ushbu ishlarni bajarilishi doirasida xalq deputatlari Quva tuman Kengashi deputatlari tuman tibbiyot
muassasalaridagi qurilish, ta’mirlash ishlari bo‘yicha navbatdagi o‘rganishlarni
olib bordilar. 

Jumladan, deputatlar Yangi hayot mahalla fuqarolar yig‘ini hududida joylashgan 4-son oilaviy poliklinikada
“Hamkor-House SSS” mas’uliyati cheklangan jamiyati tomonidan, shuningdek, Qorashoh
mahalla fuqarolar yig‘ini hududidagi 9-son oilaviy poliklinikada “Mirzo Saodat”
MChJ tomonidan amalga oshirilayotgan qurilish va ta’mirlash ishlarining sifati va
bajarilish holatini o‘rgandilar. 

O‘rganishlar davomida, ayniqsa, 9-son oilaviy poliklinikada qurilish-ta’mirlash ishlari belgilangan
muddatdan kechiktirilgani, shu bilan birga ishlar to‘liq yakunlanmagani hamda sifat
jihatdan bir qator kamchiliklarga yo‘l qo‘yilgani aniqlandi. Aniqlangan holatlar
yuzasidan deputatlar tomonidan qurilish ishlariga mas’ul shaxslarga tegishli e’tiroz
va tavsiyalar bildirildi. 

Shuningdek, ushbu oilaviy poliklinikada olib borilgan ishlarga huquqiy baho berish maqsadida
o‘rganish natijalarini tuman prokuraturasiga taqdim etish bo‘yicha kelishib olindi. 

Qayd etish joizki, bunday o‘rganishlar tumanda sog‘liqni saqlash tizimini izchil rivojlantirish, aholiga
yaqin, sifatli va qulay tibbiy xizmat ko‘rsatishni ta’minlash, shuningdek, davlatimiz
rahbari tomonidan belgilangan vazifalarning joylardagi ijrosini ta’minlashga qaratilgan
deputatlik nazoratining muhim yo‘nalishlaridan biri hisoblanadi.