2025-yil 15 noyabr kuni Toyloq tumani o‘zining ilk va noyob tadbiri — **“Toyloq Asalarichilik festivali – 2025”**ga mezbonlik qildi. Samarqand viloyati hokimligi, Viloyat turizm boshqarmasi, Viloyat asalarichilik uyushmasi hamda Toyloq tumani hokimligi hamkorligida tashkil etilgan mazkur festival asalarichilik sohasida erishilayotgan yutuqlar, mahalliy mehnatkashlar mahoratlari va hududning keng turistik salohiyatini namoyish etishni maqsad qildi. 

  Toyloq tabiatining go‘zalligi – festivalga samimiy ruh 

  Festival uchun maxsus tanlab olingan “O‘rmon xo‘jaligi” hududi ushbu tadbirning mazmun-mohiyatiga yanada chiroy bag‘ishladi. Toyloqning musaffo havosi, tabiiy go‘zalligi va tabiat qo‘ynidagi manzaralar mehmonlarga yuqori kayfiyat ulashdi. Bu yerda asalarichilik an’analari, mahalliy hunarmandchilik, xalq og‘zaki ijodi va milliy taomlar rang-barangligi o‘zaro uyg‘un ravishda namoyon bo‘ldi. 

  Asal, tabiiy mahsulotlar va ilmiy muloqot – bari bir maydonda 

  Festival doirasida asal va asalarichilik mahsulotlari, turli tabiiy malhamlar, qishloq xo‘jaligi mahsulotlari, milliy taomlar hamda hunarmandchilik buyumlari keng jamoatchilikka taqdim etildi. Shuningdek, soha mutaxassislari, olimlar, tadqiqotchilar va xalqaro ekspertlar ishtirokida asalarichilikning bugungi holati va kelgusi istiqbollariga bag‘ishlangan ilmiy muloqotlar ham tashkil etildi. Bu esa tadbirning nafaqat ko‘ngilochar, balki ilmiy-amaliy ahamiyati ham yuqori ekanini ko‘rsatdi. 

  Milliy musiqa va an’analar festivalga bayramona ruh bag‘ishladi 

 Festival dasturida milliy musiqa va folklor ansambllar chiqishlari, xalqona o‘yinlar, taniqli san’atkorlarning konsert dasturlari hamda milliy urf-odatlar namoyishi mehmonlarda katta taassurot qoldirdi. Tadbir nafaqat mahalliy aholi uchun, balki mamlakatning turli hududlaridan tashrif buyurgan sayyohlar uchun ham yuqori qiziqish uyg‘otdi. 

  Toyloq uchun yangi brend tadbir 

  “Toyloq Asalarichilik festivali – 2025” Samarqand viloyatida yangi brend tadbir sifatida shakllanishi, asalarichilik sohasiga bo‘lgan e’tiborni yanada kuchaytirishi va hududda turizmni rivojlantirishda muhim qadam bo‘ldi. Mamlakat bo‘ylab asalarichilikka bag‘ishlangan festivallar orasida Namangandan keyin aynan Samarqand viloyati Toyloq tumanida bunday nufuzli tadbirning o‘tkazilishi tuman uchun katta imkoniyat va ulkan sharaf hisoblanadi

Azamat Usmonov, xalq deputatlari tuman Kengashi deputati