Zarbdor tumanining Andijon mahallasida huquqni muhofaza qiluvchi organlar rahbarlari tomonidan jismoniy va yuridik shaxslar uchun sayyor qabul tashkil etildi. Tadbirda fuqarolarning turli yo‘nalishlardagi murojaatlari tinglanib, ularning muammolarini hal etish bo‘yicha aniq choralar belgilandi.
Qabul davomida yer va mulk masalalari, sud qarorlarining ijrosi, huquqiy hujjatlarni rasmiylashtirish kabi mavzularda murojaatlar qabul qilindi. Ayrim masalalar joyning o‘zida hal qilindi, qolgan murojaatlar bo‘yicha esa tegishli mas’ullarga topshiriqlar berildi.
Tuman prokurori Prezidentning PQ–1-son qarori — “2025-yilda respublika mahallalarida xavfsiz muhitni yaratish va huquqbuzarliklarning barvaqt oldini olish tizimi samaradorligini oshirish to‘g‘risida”gi qarori mazmun-mohiyatini tushuntirib berdi. Shuningdek, mahallalarda tinchlik, osoyishtalik va huquqiy tartibotni mustahkamlashga qaratilgan vazifalar alohida ta’kidlandi.
Sayyor qabulda 16-Andijon saylov okrugi deputati Ko‘chiboyev Dilshod ham ishtirok etib, fuqarolarning murojaatlarini o‘rganish, ularni hal etish bo‘yicha mutasaddi idoralar bilan hamkorlikda zarur chora-tadbirlar belgilanishiga ko‘mak berdi.
Ushbu sayyor qabul fuqarolarning davlat organlariga bo‘lgan ishonchini oshirish, ularning murojaatlarini o‘z vaqtida va joyida ko‘rib chiqish imkonini yaratdi.