Deputatlar fuqarolar bilan uchrashuv o‘tkazildi

Viloyat Kengashi deputati B. G‘afforov, tuman Kengashi deputati G. Shafoatova hamda Yangi hayot MFY yettiligi hamkorligida “Ma’rifat” ko‘chasida saylovchilar bilan navbatdagi uchrashuv tashkil etildi. Tadbirning asosiy maqsadi – fuqarolarning kundalik hayotdagi muammolari va takliflarini bevosita o‘rganish, joylardagi mavjud kamchiliklarga deputatlik nazoratini o‘rnatishdan iborat bo‘ldi.

Uchrashuv davomida deputatlar va mahalla faollari uyma-uy yurib, har bir xonadonda bo‘lib, aholining turmush sharoitlari bilan yaqindan tanishdilar. Fuqarolar tomonidan ko‘tarilgan masalalar turlicha bo‘lib, ular orasida:

ichimlik suvi ta’minotidagi uzilishlar,

elektr energiyasi va gaz ta’minotidagi muammolar,

ko‘chalar va yo‘laklarning ta’mirtalab holati,

tungi yoritgichlar yetishmasligi,

hudud obodonchiligi, chiqindi tozalash,

yoshlarni band qilish va bo‘sh vaqtini mazmunli o‘tkazish,

ijtimoiy himoyaga muhtoj oilalarga yordam ko‘rsatish masalalari alohida qayd etildi.

Deputatlar murojaatlarni diqqat bilan tinglab, ayrim muammolar bo‘yicha joyida tushuntirish va ko‘rsatmalar berdilar. Shu bilan birga, masalalarni hal etishda mas’ul tashkilot va idoralar bilan hamkorlikda amaliy chora-tadbirlar ishlab chiqilishi ma’lum qilindi.

Uchrashuv yakunida deputatlar tomonidan barcha murojaatlar ro‘yxatga olinib, ularning ijrosini ta’minlash maqsadida deputatlik nazorati o‘rnatildi. Bu jarayon muntazam ravishda kuzatib borilishi, fuqarolarga qilingan yordam va amalga oshirilayotgan ishlardan muntazam xabardor etib borilishi ta’kidlandi.

Mahalla aholisi bunday uchrashuvlar orqali o‘z muammolarini bevosita deputatlarga yetkazish imkoniyati yaratilayotganini, bu esa muammolarning tezroq hal bo‘lishiga xizmat qilishini mamnuniyat bilan qayd etdilar.