#deputatlar_nazorati #poytaxtdeputatlari #deputatlik_faoliyati #jamoat_xavfsizligi

❗️Deputatlar yo‘l harakati xavfsizligi va jamoat xavfsizligi tizimidagi islohotlar bilan yaqindan tanishdilar

🏛 Xalq deputatlari Toshkent shahar va tuman Kengashlari deputatlari hamda Toshkent shahar Kengashi kotibiyati xodimlari tomonidan Toshkent shahrida jamoat xavfsizligini ta’minlash, huquqbuzarliklarning oldini olish hamda yo‘l harakati xavfsizligi sohasida amalga oshirilayotgan ishlarni o‘rganish maqsadida Toshkent shahar Ichki ishlar bosh boshqarmasi tizimidagi qator obyektlarga tashrif tashkil etildi.

📍 Dastlab deputatlar Toshkent shahar Ichki ishlar bosh boshqarmasining Yagona tezkor boshqaruv markazida bo‘lib, markaz faoliyati, zamonaviy raqamli texnologiyalar asosida yo‘lga qo‘yilgan boshqaruv tizimlari hamda poytaxt hududida xavfsizlikni ta’minlashga qaratilgan imkoniyatlar bilan tanishdilar. Deputatlarga yagona dispetcherlik tizimi, videokuzatuv kameralari orqali vaziyatni onlayn monitoring qilish, tezkor xizmatlar faoliyatini muvofiqlashtirish hamda favqulodda holatlarga tezkor munosabat bildirish mexanizmlari yuzasidan batafsil ma’lumot berildi.

💬 O‘rganishlar davomida deputatlar tomonidan jamoat joylarida, ko‘chalarda, istirohat bog‘larida va ommaviy tadbirlar vaqtida fuqarolar xavfsizligini ta’minlash, profilaktika inspektorlarining aholi bilan ishlash samaradorligi, fuqarolar murojaatlariga xolisona yondashish, ayniqsa bolalar, ayollar va keksalar bilan ishlash amaliyoti hamda videokuzatuv tizimlarining jinoyatchilikning oldini olishdagi o‘rni yuzasidan qator savollar berildi. Mutasaddilar tomonidan ushbu masalalar bo‘yicha batafsil ma’lumotlar taqdim etildi.

📍 Shundan so‘ng deputatlar Toshkent shahar IIBB Yo‘l harakati xavfsizligi boshqarmasi Yo‘l-patrul xizmati brigadasining yangi binosida bo‘ldilar. Bu yerda xodimlarga yaratilgan zamonaviy xizmat sharoitlari, xizmat avtomobillari, maxsus texnik vositalar, Yo‘l harakati xavfsizligi yagona boshqaruv markazi faoliyati hamda yo‘l harakatini monitoring qilish va boshqarish imkoniyatlari bilan yaqindan tanishildi. Shuningdek, Yo‘l-patrul xizmati faoliyati tarixini aks ettiruvchi ichki muzey ko‘zdan kechirilib, tizimda amalga oshirilgan islohotlar va erishilgan natijalar haqida ma’lumot berildi.

🛣 Deputatlar tomonidan poytaxt ko‘chalarida transport va piyodalar oqimini tartibga solish, piyodalar bilan bog‘liq yo‘l-transport hodisalarini kamaytirish va bartaraf etish, yo‘llardagi mavjud infratuzilma holati, qoidabuzarliklarni aniqlash va oldini olish, shuningdek, o‘lim bilan bog‘liq yo‘l-transport hodisalarini keskin kamaytirish bo‘yicha amalga oshirilayotgan ishlar yuzasidan savollar o‘rtaga tashlandi.

📍 Yakuniy manzil Toshkent shahar Ichki ishlar bosh boshqarmasi Yo‘l harakati xavfsizligi boshqarmasining Ma’muriy amaliyot markazi bo‘ldi. Bu yerda deputatlar avtomatlashtirilgan foto va video qayd etish vositalari orqali aniqlanayotgan qoidabuzarliklarni rasmiylashtirish jarayonlari, ma’muriy materiallarga ishlov berish tizimi, radarlar orqali kelib tushayotgan ma’lumotlarni qayta ishlash tartibi hamda jarima ballari tizimining amaliyotdagi qo‘llanilishi bilan tanishdilar.

🔍 O‘rganishlar davomida deputatlar ichki ishlar organlari faoliyatini yanada raqamlashtirish, inson omilini qisqartirish, ma’muriy amaliyotda ochiqlik va shaffoflikni ta’minlash, fuqarolar murojaatlari bilan ishlash samaradorligini oshirish hamda yo‘l harakati xavfsizligi tizimini yanada takomillashtirish yuzasidan o‘zlarini qiziqtirgan savollarni yo‘llab, mutasaddilar bilan atroflicha fikr almashdilar.

🤝 Yakunda yo‘l harakati xavfsizligi va jamoat xavfsizligini ta’minlash sohasida amalga oshirilayotgan ishlar, mavjud muammolar va ularning yechimlari yuzasidan takliflar muhokama qilinib, deputatlik nazoratini yanada kuchaytirish hamda tegishli tashkilotlar bilan hamkorlikni izchil davom ettirish zarurligi ta’kidlandi.

📱 Telegram 📱 Instagram 📱 Facebook 📱 YouTube 🔎 E-kengash