Deputatning eng muhim fazilatlaridan biri - jamoat bilan ishlash jarayonida belgilangan reglamentga qat’iy amal qilishdir. Reglament tartib-intizomni, mas’uliyatni va tizimli ishlashni ta’minlaydi. Kengash sessiyalari, komissiya yig‘ilishlari, deputatlik so‘rovlari va fuqarolar qabuli belgilangan tartib asosida olib borilishi deputat faoliyatining samaradorligini oshiradi. 

Shu bois deputat har bir majlisda o‘z vaqtida qatnashishni, barcha masalalarni puxta o‘rganib chiqishni va qarorlar bo‘yicha asoslangan pozitsiyani bildirishni o‘ziga doimiy talab sifatida qo‘yishi kerek. 

Deputat fuqarolar bilan uchrashuvlarda hurmat va e’tibor tamoyillariga qat’iy amal qilishga, ularning dardini diqqat bilan tinglashga, har bir murojaatni befarq qoldirmaslikka, ochiq va halol muloqot olib borishga harakat qilishi lozim. Chunki deputatning odobi - uning xalq oldidagi obro‘si va ishonchidir. 

Bugungi kunda davlatimiz tomonidan qabul qilinayotgan qonunlar, Prezident farmonlari, qarorlar va dasturlar-jamiyat rivojining asosiy harakatlantiruvchi kuchi. Deputat har bir normativ-huquqiy hujjatning mazmun-mohiyatini chuqur o‘rganib, uning ijrosini joylarda ta’minlashga alohida e’tibor qaratishi lozim. 

Qonunlar ijrosini nazorat qilish, fuqarolarning huquqiy savodxonligini oshirish, mahalliy muammolarni yechishda huquqiy mexanizmlarni qo‘llash-deputatning kundalik vazifalaridan biri hisoblanadi. Biz qonunni bilishimiz, tushunishimiz va amalda qo‘llay olishimiz shart. 

Bizning faoliyatimizda yana bir eng asosiy o‘lchov - xalqning ishonchidir. Shuning uchun muntazam ravishda mahalla fuqarolar yig‘inlarida, tashabbusli uchrashuvlarda, ochiq muloqotlarda ishtirok etib kelamiz. Har bir uchrashuvda ko‘tarilayotgan masalalar bo‘yicha, tegishli tashkilotlarga deputatlik so‘rovlari yuborish, muammolarni joyida o‘rganish, mas’ullardan aniq javob va muddat talab qilish ustuvor ahamiyatga ega. 

Bugungi davr deputatdan faqat kuzatuvchi emas, balki taklif beruvchi, tashabbus ko‘rsatuvchi, amaliy natija taqdim eta oladigan lider bo‘lishni talab qiladi. Mahallalarda infratuzilma loyihalarini qo‘llab-quvvatlash, tadbirkorlikni rivojlantirishga ko‘maklashish, yoshlar va xotin-qizlar bandligini oshirish mening amaliy tashabbuslarimning ustuvor yo‘nalishlari hisoblanadi. 

Xulosa qilib aytganda deputat - bu xalq va davlat o‘rtasidagi ko‘prikdir. Bu ko‘prik reglamentga rioya qilish, deputatlik odobiga amal qilish, qonunlar va qarorlarni chuqur bilish, xalq bilan doimiy muloqot, amaliy tashabbuslar bilan mustahkamlanadi. 

Biz - har birimiz faoliyatimizda mana shu tamoyillarni bosh mezon qilib olishimiz zarur va xalq ishonchi eng katta boylik hamda eng katta mas’uliyatdir.

O‘. AKKULOV
Xalq deputatlari tuman Kengashining
Reglament va deputatlik odobi bo‘yicha doimiy komissiyasi raisi