Neftchilar mahallasi aholisi uchun muhim ahamiyatga ega bo`lgan yana bir xayrli tashabbus amalga oshirilmoqda. Xalq deputatlari Jalaquduq tuman Kengashi deputati Faridaxon Abdullaevaning ko`magi bilan mahalladagi gaz quvurlarini yangilash va ulash ishlari izchil ravishda olib borilmoqda. Hozirgi kunda ushbu loyiha yakunlanish bosqichiga yetgan bo`lib, bu ishlar mahalladagi aholining kundalik hayotida sezilarli o`zgarishlarni yaratishi shubhasiz. Loyihaning asosiy maqsadi — aholini barqaror va xavfsiz gaz ta`minoti bilan ta`minlash orqali ularning turmush darajasini yanada yaxshilash, qulay muhit yaratish hamda mahallaning infratuzilmasini zamon talablariga moslashtirishdir. Yangi gaz quvurlari o`rnatilishi natijasida uy xo`jaliklaridagi issiqlik tizimi barqaror ishlaydi, energiya tejamkorligi oshadi va xavfsizlik darajasi yuqori bo`ladi. Deputat F.Abdullaeva ta`kidlaganidek, bu kabi amaliy ishlar faqatgina texnik
o`zgarish emas, balki aholining farovon hayotini ta`minlashga qaratilgan amaliy qadamlarning yorqin ifodasidir. “Bajarilgan mehnati, mas`uliyati va fidokorligi uchun tashkilotchi xodimlarga chin qalbimdan minnatdorchilik bildiraman. Ular nafaqat ishni sifatli bajardilar, balki mahallamiz aholisi uchun qulay va barqaror muhit yaratishga ham hissa qo`shdilar”, — deydi deputat F.Abdullaeva. 

Mahallada yaratilayotgan barqaror gaz ta`minoti — fuqarolar uchun katta qulaylik bo`lib, bu o`z navbatida, oilalarning farovonligi va turmush darajasi oshishiga xizmat qiladi. Loyihaning muvaffaqiyatli yakunlanishi Neftchilar mahallasida yangilanish va taraqqiyotning navbatdagi bosqichiga yo`l ochadi. Bu kabi amaliy ishlar — “Farovon hayot yo`lida yangi qadam” shiori ostida xalq bilan muloqot va hamkorlik asosida olib borilayotgan islohotlarning amaliy ifodasi hisoblanadi.