Murojaatnoma - harakat rejasi,
Strategiya - maqsad va natija. 

2026-yilda O‘zbekiston
Respublikasi Prezidentining Oliy Majlisga yo‘llagan Murojaatnomasida belgilab berilgan
ustuvor vazifalar mamlakat taraqqiyotining yangi bosqichini belgilab beruvchi muhim
dastur sifatida jamiyat hayotining barcha sohalarini qamrab olmoqda. Ana shu vazifalar
ijrosini ta’minlash, “O‘zbekiston – 2030” strategiyasini takomillashtirishning mazmun-mohiyati
va uning amaliy ahamiyatini joylarda chuqur anglash hamda keng jamoatchilikka yetkazish,
xalq farovonligini mustahkamlash va mahallalarni barqaror rivojlantirish maqsadida
Xalq deputatlari Farg‘ona tuman Kengashi deputatlari Ozodaxon Dadajonova, Shuxratjon
Raximov hamda O‘zbekiston “Adolat” SDP Farg‘ona tuman Kengashi raisi Nodirbek Karimovlar tashabbusi
bilan tuman hududidagi 3-sonli umumta’lim maktabida pedagog-xodimlar ishtirokida
uchrashuv tashkil etildi. 

Uchrashuv davomida Prezident Murojaatnomasida ta’lim sohasiga
oid belgilab berilgan ustuvor yo‘nalishlar, jumladan, bilimli, vatanparvar va raqobatbardosh
yosh avlodni tarbiyalash, pedagog kadrlarni har tomonlama qo‘llab-quvvatlash, ta’lim
sifati va samaradorligini oshirish masalalariga alohida urg‘u berildi. Shu bilan
birga, “O‘zbekiston – 2030” strategiyasi doirasida ta’limni isloh qilish, mahalla
va maktab hamkorligini mustahkamlash, inson qadrini ulug‘lashga qaratilgan islohotlarning
mohiyati atroflicha tahlil qilindi. 

Tadbirda ta’lim sohasida amalga oshirilayotgan islohotlar
nafaqat bugungi kun, balki mamlakatning kelajagi, xalq farovonligi va jamiyat barqarorligi
uchun mustahkam poydevor ekani ta’kidlandi. Pedagog-xodimlar tomonidan Murojaatnoma
va Strategiyada belgilangan vazifalarni hayotga tatbiq etishda o‘zlarining faol
ishtirokini yanada kuchaytirish, yoshlar tarbiyasida mas’uliyat va tashabbuskorlikni
oshirish bo‘yicha qator fikr va takliflar bildirildi. 

Uchrashuv ochiq va samimiy muloqot ruhida o‘tib, unda davlat
siyosatida belgilangan ustuvor vazifalarni joylarda amalga oshirishda ta’lim muassasalari,
mahalla va deputatlar o‘rtasidagi hamkorlikni yanada mustahkamlash zarurligi qayd
etildi. Bunday uchrashuvlar Prezident Murojaatnomasining mazmun-mohiyatini xalq
ongiga chuqur singdirish, “O‘zbekiston – 2030” strategiyasini hayotga tatbiq etishda
jipslik va mas’uliyatni kuchaytirishga xizmat qilishi ta’kidlandi.