O‘zbekiston Respublikasi Prezidentining 2025-yil 1-apreldagi PQ-132-sonli qarori hamda Xalq deputatlari Marg‘ilon shahar Kengashining 2026-yil 7-fevraldagi VII-19-9-11-168-K/26-son qarori ijrosini ta’minlash maqsadida navbatdagi o‘rganish ishlari olib borildi.

Mazkur o‘rganish jarayonida Xalq deputatlari Marg‘ilon shahar Kengashi kotibiyati mudiri A.Ermatov hamda shahar Kengashi deputati, kotibiyat bosh mutaxassisi N.Akbarova Yuksalish mahalla fuqarolar yig‘inida bo‘lib, hududda amalga oshirilayotgan ishlar bilan yaqindan tanishdilar. O‘rganishlar MFY raisi F.Kuldashev hamrohligida tashkil etildi.

Oʻrganishda 2026-yilda Marg‘ilon shahrini ijtimoiy-iqtisodiy rivojlantirish doirasida “Ipak Yo‘li” mas’uliyati cheklangan jamiyati tomonidan mehmonxona xizmatlarini tashkil etish bo‘yicha amalga oshirilayotgan ishlar atroflicha ko‘rib chiqildi.

O‘rganishlar natijasida mazkur loyiha doirasida hududda xizmat ko‘rsatish infratuzilmasini rivojlantirish, yangi ish o‘rinlari yaratish hamda aholi va mehmonlar uchun qulay sharoitlar yaratishga qaratilgan ishlar bosqichma-bosqich amalga oshirilayotgani ta’kidlandi.

Shu bilan birga, loyiha ijrosini jadallashtirish, xizmatlar sifatini yanada oshirish hamda belgilangan vazifalarning o‘z vaqtida bajarilishini ta’minlash yuzasidan tegishli tavsiyalar berildi.

Xalq deputatlari Marg‘ilon shahar Kengashi tomonidan hududlarni ijtimoiy-iqtisodiy rivojlantirishga qaratilgan loyihalar ijrosi doimiy nazoratga olingan bo‘lib, bu boradagi ishlar davom ettiriladi.