Navoiy shahridagi liftlar holati o‘rganildi

Joriy yilning 18-mart kuni Xalq deputatlari Navoiy shahar Kengashi deputatlari J. Hafizov va G. Xasanova hamda Kengash kotibiyati bosh mutaxassislari M. Astanova va D. Toyirovlar tomonidan Navoiy shahridagi ko‘p qavatli uylar hamda ijtimoiy soha obyektlaridagi liftlarning texnik holati o‘rganildi. Mazkur o‘rganish ishlari aholiga qulay va xavfsiz sharoit yaratish, mavjud muammolarni aniqlash hamda ularni bartaraf etishga qaratildi.O‘rganish jarayonida shaharning turli hududlaridagi liftlar ko‘zdan kechirilib, ularning ishlash holati, xavfsizlik talablari va texnik xizmat ko‘rsatish darajasi tahlil qilindi. Xususan, Ibn Sino ko‘chasidagi 22-, 24- va 26-uylar (yotoqxonalar), Lev Tolstoy ko‘chasida joylashgan 21- va 27-uylar, shuningdek, tibbiyot birlashmasi hamda Navoiy shahridagi ayrim kasalxonalardagi liftlar alohida o‘rganildi.Aniqlanishicha, mazkur manzillarda 2025-yilda yangi liftlar o‘rnatilgan bo‘lishiga qaramay, ayrim texnik nosozliklar mavjud. Jumladan, liftlarning qavatlararo chaqiruv tugmalari ishlamayotgani kuzatildi. Bu esa fuqarolar uchun noqulaylik tug‘dirish bilan birga, kundalik foydalanishda muammolarni yuzaga keltirmoqda.Mazkur kamchiliklar yuzasidan mas’ul tashkilotlarga tegishli ko‘rsatmalar berildi. Deputatlar J. Hafizov va G. Xasanovalar muammoni qisqa muddatlarda bartaraf etish, liftlarning to‘liq va xavfsiz ishlashini ta’minlash zarurligini ta’kidladilar. Shuningdek, bunday holatlarning oldini olish maqsadida muntazam texnik ko‘rik va nazorat ishlarini kuchaytirish lozimligi qayd etildi.O‘rganish yakunida aniqlangan muammolar deputat nazoratiga olinib, ularni bartaraf etish bo‘yicha aniq choralar belgilandi. Fuqarolarning murojaatlari asosida amalga oshirilayotgan bunday o‘rganishlar shahar infratuzilmasini rivojlantirish va aholining turmush farovonligini oshirishda muhim ahamiyat kasb etadi.