Ijtimoiy himoya tizimini moliyalashtirishda yangi davr

🇺🇿 O‘zbekiston Respublikasi Prezidentining 2025-yil 30-yanvardagi "Aholini ijtimoiy himoya qilish tizimini moliyalashtirish tartib-taomillarini takomillashtirish" to‘g‘risidagi PF-17-sonli Farmoni, ijtimoiy himoya sohasida "Inson qadri uchun" tamoyilini amalda ta’minlashning huquqiy asosi bo‘lib xizmat qiladi.

🔴Farmonning strategik maqsadi:

Mazkur hujjat ijtimoiy ko‘makka muhtoj fuqarolarni qo‘llab-quvvatlash jarayonlaridagi ortiqcha qog‘ozbozlik va ma’muriy to‘siqlarni bartaraf etishga qaratilgan. Asosiy maqsad — mablag‘larning har bir so‘mi manziliga aniq va kechikmasdan yetib borishini ta’minlaydigan shaffof tizim yaratishdir.

🔴Farmon bilan mahalliy davlat hokimiyati vakillik organlarining ijtimoiy masalalardagi roli tubdan oshirildi.

🔴Mahalliy Kengashlar endilikda:

“Infratuzilma va ijtimoiy barqarorlik” jamg‘armalariga yo‘naltirilgan mablag‘lardan foydalanish Xalq deputatlari tuman (shahar) Kengashlari qarorlari asosida amalga oshiriladi.

Bu nima degani? Endi markazdan ko‘rsatma kutmasdan, aynan o‘sha hududning og‘riqli nuqtalari, ehtiyojmand oilalarning sharoiti va mahalla infratuzilmasidagi kamchiliklarni bartaraf etish uchun mablag‘lar bevosita mahalliy deputatlar roziligi bilan sarflanadi.

Nazorat va hisobdorlik: Jamg‘arma mablag‘larining har bir tiyini qaysi ijtimoiy loyihaga yoki qaysi oilaga yo‘naltirilishi ustidan deputatlik nazorati o‘rnatiladi. Bu esa mablag‘larning "ko‘chaga chiqib ketmasligi" va adolatli taqsimlanishini kafolatlaydi.

🔴Tizimdagi muhim o‘zgarishlar:

Mahallabay ishlash: Ijtimoiy xizmatlar endi xonadonbay o‘rganishlar asosida, real ehtiyojga qarab shakllantiriladi.

Moliyaviy erkinlik: Tuman va shahar hokimliklari o‘z hududidagi ijtimoiy muammolarni hal etish uchun yetarli moliyaviy manbaga va uni ishlatish bo‘yicha mustaqil huquqqa ega bo‘ldi.

Shaffoflik: Jamg‘armalar hisobidan amalga oshiriladigan har qanday xarajat xalq vakillari — deputatlar tomonidan muhokama qilinib, tasdiqlanganidan so‘nggina amalga oshiriladi.

🔵 Ushbu yangi tizim davlat va jamiyat o‘rtasidagi ishonchni mustahkamlab, eng chekka mahalladagi muhtoj insonning ham dardi va muammosi e’tibordan chetda qolmasligini ta’minlaydi.