Davlatimiz rahbarining PQ-454-sonli qaroriga muvofiq Boyovut tumani A. Navoiy mahallasida joylashgan 6-sonli davlat maktabgacha ta’lim tashkiloti yangidan qurilib, foydalanishga topshirildi. Umumiy qiymati 3 milliard 600 million so‘m bo‘lgan loyiha doirasida barpo etilgan muassasada bolajonlar uchun keng va yorug‘ xonalar, zamonaviy o‘quv hamda o‘yin jihozlari bilan ta’minlangan qulay shart-sharoitlar yaratildi.

Mazkur muassasada 35 nafar xodim doimiy ish o‘rni bilan ta’minlanib, kelajak avlodga sifatli ta’lim-tarbiya berish uchun barcha imkoniyatlar yaratilgan.

Shuni alohida ta’kidlash joizki, mazkur maktabgacha ta’lim tashkilotini ta’mirlash va yangidan barpo etish ishlarini davlat dasturiga kiritishda tuman Kengashi deputati Karomat Karimovaning tashabbusi va sa’y-harakatlari muhim o‘rin tutdi. Shuningdek, qurilish-ta’mirlash jarayonlari davomida deputat tomonidan muntazam deputatlik nazorati o‘rnatilib, aniqlangan kamchiliklar yuzasidan tegishli tashkilotlarga deputat so‘rovlari yuborilib, ishlarning sifatli va o‘z vaqtida bajarilishi ta’minlanishiga alohida e’tibor qaratildi.