Xalq deputatlari Parkent tuman Kengashiga 21-Nevich saylov okrugidan saylangan deputat Yoqubova Xusnora Abduxamidovna o‘zi saylangan okrugdagi “Novdak” MFY hududida joylashgan 19-umumiy o‘rta ta’lim
maktabida 8–11-sinf o‘quvchi qizlar uchun tashkil etilgan “Erta nikoh — yoshlikka dog‘, onalikka sinov” mavzusidagi ma’naviy-ma’rifiy davra suhbatida ishtirok etdi. Tadbir davomida deputat yig‘ilganlarga “Yoshlarga oid davlat siyosati to‘g‘risida”gi Oʻzbekiston Respublikasi Qonunining mazmun-mohiyati yuzasidan batafsil ma’lumot berdi. Qonunda yoshlarning huquq va erkinliklarini ta’minlash, ularning intellektual, jismoniy va ma’naviy jihatdan barkamol bo‘lib voyaga yetishi uchun zarur shart-sharoitlar yaratish davlat siyosatining ustuvor yo‘nalishlaridan biri ekani ta’kidlandi. Qonunga ko‘ra yoshlarning bepul umumiy o‘rta ta’lim olish huquqi kafolatlanadi, ularni majburiy mehnatga yoki noqonuniy harakatlarga jalb etishga yo‘l qo‘yilmaydi, qizlarning ta’lim olishi, kasb-hunar egallashi va jamiyatda munosib o‘rin egallashi davlat tomonidan qo‘llab-quvvatlanadi, yoshlarning sog‘lig‘ini saqlash, ularni ijtimoiy himoya qilish va bandligini ta’minlash bo‘yicha aniq mexanizmlar belgilanganligi aytib o‘tildi. Shuningdek deputat yoshlar tarbiyasi, ularning huquq va manfaatlarini himoya qilish, ayniqsa qizlarning ta’lim olish huquqini ta’minlash masalalariga alohida to‘xtalib o‘tdi. Erta nikohning salbiy oqibatlari, qizlarning sog‘lig‘iga zarar yetkazishi, ta’limdan uzilish, ijtimoiy faollikning pasayishi hamda kelajak rejalarning cheklanishi haqida atroflicha tushuntirishlar berildi. Tadbir yakunida o‘quvchilar tomonidan berilgan savollarga atroflicha javoblar berilib, yoshlarni har tomonlama
qo‘llab-quvvatlash, ularning qonuniy manfaatlarini himoya qilish masalasida doimiy muloqot olib borilishi ta’kidlandi. Mazkur ma’naviy-ma’rifiy tadbir yoshlar o‘rtasida huquqiy ong va huquqiy madaniyatni yuksaltirish, ayniqsa qizlarning ta’limga bo‘lgan qiziqishini oshirish hamda erta nikohning salbiy oqibatlari haqida tushunchalarni mustahkamlashga xizmat qildi.