Mazkur uchrashuvda O‘zbekiston Respublikasi Prezidentining 2025 yil 21 aprelda qabul qilingan PF-71-sonli farmoni – "Korrupsiyaga qarshi kurashish tizimini yanada takomillashtirish bo‘yicha belgilangan ustuvor vazifalar ijrosini samarali tashkil etishga doir chora-tadbirlar to‘g‘risida"gi muhim hujjat mazmun-mohiyati keng yoritildi. Tadbir ishtirokchilariga ushbu farmon doirasida amalga oshirilishi lozim bo‘lgan asosiy yo‘nalishlar, vazifalar hamda tashkilot va muassasalarning zimmasiga yuklatilgan mas’uliyatli burchlar haqida batafsil ma’lumotlar berildi. 

Yig‘ilish davomida korrupsiyaning iqtisodiy va ijtimoiy taraqqiyotga yetkazayotgan salbiy ta’siri, davlat va jamiyat rivojiga qilayotgan zararli ta’siri atroflicha tahlil qilindi. Xususan, elektr ta'minoti tizimida yuzaga kelishi mumkin
bo‘lgan korrupsion holatlar, ularning oldini olish, ochiqlik va shaffoflikni ta’minlash, xodimlarning huquqiy madaniyatini oshirish kabi dolzarb masalalar muhokama markazida bo‘ldi. 

Tadbirda ishtirokchilar tomonidan korrupsiyaning oldini olishda fuqarolik jamiyati institutlari, ommaviy axborot vositalari, jamoatchilik nazorati va axborot texnologiyalarining tutgan o‘rni to‘g‘risida ham alohida to‘xtalib o‘tildi.
Korrupsiya holatlari aniqlanganda fuqarolarning tezkor murojaat qilish mexanizmlarini takomillashtirish, xodimlar o‘rtasida muntazam huquqiy targ‘ibot ishlarini olib borish zarurligi ta’kidlandi. 

Yakunda barcha ishtirokchilar tomonidan korrupsiyaga qarshi kurashish har bir fuqaroning vijdoniy burchi ekani, bu borada har bir soha vakili, ayniqsa davlat idoralarida faoliyat yuritayotgan xodimlar yuksak mas’uliyat bilan yondashishi lozimligi alohida qayd etildi. 

Mazkur tadbir tuman miqyosida korrupsiyaga qarshi kurashish bo‘yicha amalga oshirilayotgan ishlarni kuchaytirish, ijtimoiy ongda korrupsiyaga nisbatan murosasiz munosabatni shakllantirish, xodimlar o‘rtasida halollik, vijdonlilik va qonuniylik tamoyillarini keng targ‘ib qilishga xizmat qildi.

Oltinsoy tumani Kengash Kotibiyati Axborot xizmati

✅ Kanalga ulanish uchun: https://t.me/OltinsoyKengashkotibiyati