Toshkent shahar Olmazor tumani “Ahil” mahalla fuqarolar yig‘inida Olmazor tuman hokimligi xodimlari, mahalla uyushmasi va tuman xotin-qizlar bo‘limi vakillari, aholi hamda mahalla “yettilligi” a’zolari ishtirokida ochiq muloqot tashkil etildi. Mazkur uchrashuvda xalq deputatlari Olmazor tumani Kengashi deputati Abdujalil Xasanov boshchiligida 2025-yil 3-yanvardagi PQ-1-sonli qarori ijrosini ta’minlash maqsadida bir qator amaliy ishlar olib borilmoqda.

Uchrashuv davomida mahallalarda xavfsiz muhitni ta’minlash, favqulodda vaziyatlarning oldini olish, xotin-qizlar bilan tizimli ishlash hamda aholi bilan hamkorlikni mustahkamlash masalalari muhokama qilindi. Deputat o‘z nutqida hududda jinoyatchilikning oldini olish, aholi xavfsizligini ta’minlash va profilaktik tadbirlarni kuchaytirish bugungi kunning dolzarb vazifalaridan biri ekanini ta’kidladi.

Shuningdek, uchrashuv jarayonida mahalliy Kengash deputatlari faoliyatining ustuvor yo‘nalishlari doirasida bir qator masalalarga alohida e’tibor qaratildi. Xususan, mahalladagi yoshlar yetakchisi faoliyati va yoshlar bandligi, ijtimoiy xodimlar tomonidan aholining ehtiyojmand qatlamlariga ko‘rsatilayotgan xizmatlar sifati, xotin-qizlar faoli tomonidan olib borilayotgan ishlar samaradorligi muhokama qilindi.

Deputat Abdujalil Xasanov ta’kidlaganidek, hududlarda mavjud masalalarni joyiga chiqib o‘rganish, ularni tahlil qilish hamda navbatdagi sessiyalarda ko‘rib chiqish mahalliy Kengash deputatlarining muhim vazifalaridan biri hisoblanadi. Mazkur uchrashuv ham aynan fuqarolar bilan bevosita muloqot orqali muammolarni aniqlash va ularning yechimini topishga qaratilgani bilan ahamiyatli bo‘ldi.