Joriy yilgi hosil mavsumida Jondor tumani paxta
dalalarida terim ishlari jadal sur’atlarda davom etmoqda. Paxta yetishtirish va
yig‘im-terim jarayonlarida faol ishtirok etayotgan ilg‘or fermer xo‘jaliklari
va terimchilar alohida e’tirofga sazovor bo‘lmoqda. 

Jumladan, Xalq deputatlari Jondor tumani Kengashi
deputati Baxronjon Yusupov tumandagi Namgoni mahalla fuqarolar yig‘ini hududida
joylashgan "Jondor Tomorqa Xizmati" MChJ faoliyati bilan tanishib, joriy
yil mavsumida 76 gektar maydonga chigit ekib, paxta hosili yetishtirilgan. JR “Cotton” paxta klasteri bilan 225 tonna hosil
topshirish yuzasidan shartnoma imzolangan. Hozirgi vaqtda mazkur xo‘jalikda
otryad rahbari Shuxrat Sultonov boshchiligida 41 nafar terimchi paxta terimida
ishtirok etmoqda. Terimchilarning
o‘rtacha kunlik ko‘rsatkichi 120-150 kilogramm atrofida bo‘lmoqda. 

Xo‘jalikdagi ilg‘or terimchilar orasida O.Ashurova,
A.G‘aybullaeva, S.Rajabova, Z.Turdievalar alohida ajralib turibdi. Ushbu ilg‘or
terimchilar boshqalarga ibrat bo‘lmoqdalar. Ularning bunday fidoyiligi,
mehnatsevarligi va mas’uliyat bilan ishlayotgani terim jarayonining sifatli va
o‘z vaqtida bajarilishiga katta hissa qo‘shmoqda. 

Tuman miqyosida shunday ilg‘orlar alohida e’tirof
etilib, esdalik sovg‘alari va rag‘batlantiruvchi mukofotlar bilan
taqdirlanmoqda. Bu kabi rag‘batlar esa qolgan terimchilarni ham faollikka
undab, hosilni tez va sifatli yig‘ib olishda muhim omil bo‘lmoqda.