Xalıq deputatları Qaraózek rayonlıq Keńesiniń gezektegi onınshı sessiyası bolıp ótti. Sessiyaǵa rayonlıq Keńes deputatları, siyasiy partiyalar, jaslar másláhát toparı hám ekspert topar aǵzaları, hákim orınbasarları, rayonlıq mákeme, shólkemler hám ǵalaba xabar quralları wákilleri qatnastı. Sessiya kún tártibinde dáslep rayon prokuraturası tárepinen 2025-jıldıń 6 ayı dawamında ámelge asırılǵan jumısları boyınsha rayon prokurorı B.Aberkulovtıń hám rayonlıq Ádillik bólimi baslıǵı A.Iskenderovlardıń málimlemeleri tıńlandı.

Sessiya kún tártibindegi rayonlıq Ishki isler bóliminiń jınayatshılıqqa qarsı gúresiw, huqıqbuzarlıqlardıń aldın alıw hám jámiyetlik tártipti saqlaw, puqaralardıń qáwipsizligin támiyinlew baǵdarında bólim baslıǵı B.Shaxanovtıń hám rayon hákiminiń birinshi orınbasarı B.Ayapbergenovtıń jergilikli byudjet dáramatlarınıń orınlanıwı boyınsha esabatları hám rayonda jaylasqan ekonomikalıq hám sociallıq infrastrukturalarǵa iye «Jańa Ózbekstan» massivinen turaq jay alıwshı puqaralarǵa tuwrıdan-tuwrı subsidiya ajıratıw boyınsha usınısları dodalanıldı. Sonday-aq, sessiyada rayonlıq Shańaraq hám hayal-qızlar bólimi tárepinen ámelge asırılǵan jumısları boyınsha rayon hákimi orınbasarı R.Sagidullaevanıń esabatı tıńlandı.

Bunnan soń sessiya kún tártibindegi rayonlıq medicina bólimi hám jaslar isleri agentligi rayonlıq bólim baslıqlarınıń 2025-jıldıń 6 ayı dawamında ámelge asırılǵan jumıslar boyınsha esabatı hám Qaraózek rayonı boyınsha fermer xojalıqlarına shor juwıw hám vegetaciya dáwirinde suwǵarıw jumısları ushın ajıratılǵan sheklengen suw limitlerin qayta tastıyıqlaw haqqındaǵı rayonlıq “Suw jetkerip beriw xızmeti” mámlektlik mákemesi direktorı B.Aytbaevtıń usınısı dodalanıldı. Sonday-aq, sessiya kún tártibine turaqlı komissiyalar usınısları boyınsha kiritilgen máseleler tolıǵı menen kórip shıǵılıp, aldaǵı isleniwi tiyis wazıypalar belgilenip alındı hám sessiya óz jumısın juwmaqladı.