Xalq deputatlari Oltinsoy tumani Kengashining Ijtimoiy soha, yoshlar siyosati, madaniyat va sport masalalari bo‘yicha doimiy komissiyasi yig‘ilishi bo‘lib o‘tdi. Yig‘ilishda tumanda sog‘liqni saqlashni rivojlantirishga oid davlat dasturining ijrosi, jumladan: 

kasalliklar profilaktikasi holati, 

sog‘lom turmush tarzini targ‘ib etish, 

to‘g‘ri ovqatlanishni shakllantirish, 

aholi salomatligini yaxshilash bo‘yicha ko‘rilayotgan choralar, 

hamda 2025-yilning birinchi yarim yilligi davomida amalga oshirilgan ishlar muhokama qilindi. 

Yig‘ilishda Oltinsoy tuman tibbiyot birlashmasi boshlig‘i Rahmonov Murtaza Abdixalilovich qatnashib, mavzuga oid hisobot taqdim etdi. U o‘z so‘zida tumanda tibbiy xizmat ko‘rsatish sifati, birinchi bosqich tibbiy yordam ko‘rsatish tizimi, aholi orasida profilaktik tadbirlar samaradorligi, shuningdek, ayrim kasalliklar bo‘yicha statistik ko‘rsatkichlar va ularni kamaytirish bo‘yicha amalga oshirilayotgan chora-tadbirlar haqida atroflicha ma’lumot berdi. 

Komissiya a’zolari tomonidan hisobot yuzasidan bir qator savollar berildi hamda takliflar ilgari surildi. Jumladan, profilaktika ishlarini yanada kuchaytirish, tibbiy kadrlar malakasini oshirish, qishloq joylarda tibbiy xizmat sifatini yaxshilash, bolalar va ayollar salomatligiga qaratilgan dasturlarni kengaytirish bo‘yicha takliflar bildirildi. 

Yig‘ilish yakunida sog‘liqni saqlash sohasidagi mavjud muammolarni bartaraf etish, davlat dasturi ijrosini to‘liq ta’minlash va kelgusida amalga oshirilishi lozim bo‘lgan vazifalar yuzasidan aniq chora-tadbirlar belgilab olindi. 

Oltinsoy tumani Kengash Kotibiyati Axborot xizmati