Davlatimiz rahbari raisligida aholi bandligini oshirish va kambag‘allikni qisqartirish bo‘yicha o‘tkazilgan videoselektor yig‘ilishida berilgan ustuvor topshiriqlar ijrosini Termiz shahrida so‘zsiz va amalda ta’minlash borasida tizimli ishlar jadal davom ettirilmoqda.

Termiz shahar hokimi, xalq deputatlari shahar Kengashi deputati Sh.Lolayev shahardagi mutasaddi rahbarlar hamda “mahalla yettiligi” vakillari bilan birgalikda shahardagi “Yulduz” mahallasida bo‘lib, keng qamrovli o‘rganish tadbirlarini o‘tkazdilar.

Tashrif davomida shahar hokimi va mas’ullar mahalladagi ijtimoiy reyestrda (kambag‘allik reyestri) turgan oilalar xonadonlarida bo‘lib, ular bilan dildan suhbatlashdilar. Xonadonlardagi ijtimoiy sharoitlar, oila a’zolarining bandlik darajasi va daromad manbalari sinchkovlik bilan o‘rganildi. Xususan:

• Bandlikni ta’minlash: Ishsiz oila a’zolarini doimiy ish o‘rinlariga joylashtirish, kasb-hunar va tadbirkorlikka o‘qitish;

• Imtiyozli ko‘mak: Tadbirkorlikni boshlash istagida bo‘lgan fuqarolarga imtiyozli kreditlar va subsidiyalar ajratish orqali ularni doimiy daromad manbai bilan ta’minlash;

• Ijtimoiy-tibbiy yordam: Ehtiyojmand oilalarning salomatligi, ijtimoiy nafaqalar va boshqa turdagi yordamlarni o‘z vaqtida olishlari yuzasidan aniq vazifalar belgilab olindi.

"Prezidentimiz tomonidan oldimizga qo‘yilgan eng asosiy vazifa — har bir oilaning ijtimoiy ahvolini o‘rganib, ularga 'xonadonbay' yondashgan holda daromad manbaini yaratib berishdir. 'Yulduz' mahallasida o‘tkazgan o‘rganishlarimiz davomida har bir oilaning muammosini tinglab, ularni kambag‘allikdan chiqarish bo‘yicha aniq manzilli rejalarni belgilab oldik. Bu boradagi ishlarni shahar miqyosida qat'iy davom ettiramiz," — deya ta'kidladi shahar hokimi, deputat Sh.Lolayev.

Aholining turmush darajasini yaxshilash va kambag‘allikni qisqartirishga qaratilgan amaliy chora-tadbirlar shahar hokimligi va deputatlar tomonidan qat’iy nazoratga olindi.