Xalq deputatlari Shayxontohur tuman Kengashining Agrar, suv xoʻjaligi va ekologiya masalalari boʻyicha doimiy komissiyasi aʼzolari va deputatlari tomonidan fuqarolar murojaatlari asosida Kamolon qabristonida joylashgan xonadonlardagi mavjud muammolar oʻrganildi.
Oʻrganish jarayonida “Yangiobod” mahalla fuqarolar yigʻini faollari ham ishtirok etib, hududda istiqomat qiluvchi aholining murojaatlari, mavjud muammolari va takliflari tinglandi.
Jumladan, mazkur xonadonlarga kirib-chiqish uchun alohida yoʻl tashkil etish masalasi atroflicha muhokama qilindi. Shuningdek, aholi uchun qulay va xavfsiz harakatlanish sharoitlarini yaratish, hududdagi mavjud infratuzilma bilan bogʻliq masalalarni bartaraf etish yuzasidan fikr va takliflar bildirildi.
Murojaatlarda koʻtarilgan masalalarni ijobiy hal etish maqsadida masʼullar tomonidan hududdagi mavjud imkoniyatlar oʻrganilib, zarur chora-tadbirlarni amalga oshirish boʻyicha tegishli takliflar ishlab chiqildi.
Fuqarolar murojaatlarida koʻtarilayotgan ijtimoiy masalalarni joyiga chiqqan holda oʻrganish, aholi bilan bevosita muloqot qilish va ularning qonuniy yechimini taʼminlash deputatlik faoliyatining muhim yoʻnalishlaridan biri hisoblanadi.