Hamkorlik — inson huquqlari va qonuniy manfaatlar yo‘lida

✅ Navoiy shahrida muhim hamkorlikka asos solindi
«MADAD» muassasasi shaklidagi nodavlat notijorat tashkiloti hamda Xalq deputatlari Navoiy shahar Kengashi kotibiyati o‘rtasida o‘zaro hamkorlik to‘g‘risida Memorandum imzolandi.

🤝 Mazkur Memorandumning asosiy maqsadi — fuqarolarning huquq va qonuniy manfaatlarini himoya qilish, aholining huquqiy savodxonligini oshirish hamda ularning murojaatlari bilan ishlashda hamkorlikni yanada kuchaytirish.

⚖️ Hamkorlikning huquqiy asosi sifatida O‘zbekiston Respublikasining 2014-yil 25-sentabrdagi «Ijtimoiy sheriklik to‘g‘risida»gi O‘RQ-376-son Qonuni muhim ahamiyatga ega.
Mazkur Qonunning 3-moddasiga ko‘ra, ijtimoiy sheriklik davlat organlari hamda nodavlat notijorat tashkilotlari va fuqarolik jamiyatining boshqa institutlari o‘rtasidagi, mamlakatni ijtimoiy-iqtisodiy rivojlantirish, inson huquqlari va qonuniy manfaatlarini himoya qilishga qaratilgan hamkorlikni anglatadi.

📌 Shuningdek, O‘zbekiston Respublikasining 2018-yil 12-apreldagi «Jamoatchilik nazorati to‘g‘risida»gi O‘RQ-474-son Qonuni ham bunday hamkorlik uchun muhim huquqiy asos hisoblanadi.
Ushbu huquqiy normalardan kelib chiqib, tomonlarning hamkorligi fuqarolarning murojaatlarini o‘rganish, ularga huquqiy tushuntirish va maslahatlar berish, aholining huquqiy madaniyatini yuksaltirish hamda jamoatchilik bilan ochiq muloqotni rivojlantirishga xizmat qiladi.

💬 Eng muhimi, mazkur Memorandum qog‘ozdagi kelishuv emas, balki fuqarolarning muammolarini tinglash, ularning huquq va manfaatlarini qonuniy asosda himoya qilishga qaratilgan amaliy hamkorlikning yangi bosqichi bo‘lishi ko‘zda tutilmoqda.

🌱 Inson qadri, uning huquq va erkinliklarini ta’minlash — davlat organlari va fuqarolik jamiyati institutlarining mushtarak vazifasidir.