Hisobotga ko‘ra, joriy yilning birinchi yarmida tumanda 1 968 ta murojaat kelib tushgan bo‘lib, shundan 1 766 tasi ko‘rib chiqilgan, 202 tasi o‘rganish jarayonida. Ko‘rib chiqilgan murojaatlarning 828 tasi ijobiy hal etilgan. Shu bilan birga, murojaatlarni ijobiy hal etish darajasi o‘tgan yilning mos davriga nisbatan pasaygani qayd etildi.

Sessiya davomida gaz ballonlarini to‘ldirish, ijtimoiy nafaqalar, bir martalik moddiy yordam, elektr ta’minoti, aliment undirish va ish bilan ta’minlash masalalari bo‘yicha murojaatlar holati tahlil qilindi. Shuningdek, takroriy va jamoaviy murojaatlar soni, fuqarolar murojaatlarini ko‘rib chiqish sifati hamda mas’ul tashkilotlar tomonidan amalga oshirilayotgan ishlar yuzasidan axborotlar eshitildi.

Muhokamalar davomida murojaatlar bilan ishlash samaradorligini oshirish, fuqarolar muammolarini o‘z vaqtida hal etish, sayyor qabullarni tizimli tashkil qilish, mahalla yettiligi bilan hamkorlikni kuchaytirish hamda murojaatlar ko‘p tushayotgan tashkilotlar faoliyatini yanada takomillashtirish bo‘yicha taklif va tavsiyalar bildirildi.

Muhokamalar yakunida tuman hokimi J.Nazarovning hisoboti qoniqarli deb topildi. Murojaatlar soni yuqori bo‘lgan sohalar va mahallalarda mavjud muammolarni bartaraf etish, tegishli "yo‘l xaritalari"ni ishlab chiqish, sayyor qabullarni tizimli tashkil etish hamda mas’ul tashkilotlar faoliyati ustidan nazoratni kuchaytirish bo‘yicha tegishli qaror qabul qilindi.

Qaror ijrosi ustidan nazorat Xalq deputatlari Bogʻot tumani Kengashining doimiy komissiyalari zimmasiga yuklatildi.