Xalq deputatlari Termiz shahar Kengashining 5-“Kattabog‘” saylov okrugi deputati I.Tangirov hamda Kengash kotibiyati bosh mutaxassisi R.Mamashukurovlar “Kattabog‘” mahallasida bo‘lib, navbatdagi nazorat-tahlil tadbirlarini o‘tkazdilar.
Mazkur o‘rganish jarayoni shahar Kengashining navbatdagi sessiyasi kun tartibiga kiritilgan dolzarb masala — shaharda jinoyatchilik va huquqbuzarliklar profilaktikasining samaradorligi yuzasidan tayyorlanayotgan materiallarni joyida, amaliyot tahlili misolida o‘rganish maqsadida tashkil etildi.
O‘rganish davomida mahalladagi kriminogen vaziyat va xavfsizlik choralari O‘zbekiston Respublikasining “Huquqbuzarliklar profilaktikasi to‘g‘risida”gi O‘RQ–371-sonli Qonuni talablari doirasida sinchkovlik bilan ko‘rib chiqildi. Xususan, quyidagi muhim yo‘nalishlarga alohida e’tibor qaratildi:
Manzilli va individual profilaktika: Mahallada huquqbuzarlik sodir etishga moyilligi bo‘lgan, muqaddam sudlangan, profilaktik nazoratda yoki probatsiya hisobida turuvchi shaxslar bilan olib borilayotgan manzilli "xonadonbay" tushuntirish va profilaktika ishlari samaradorligi;
Oilaviy munosabatlarni sog‘lomlashtirish: Ajrim yoqasiga kelib qolgan notinch oilalar, nizoli xonadonlar bilan ishlash, oilaviy kelishmovchiliklarni erta bartaraf etish hamda xotin-qizlarga nisbatan tazyiq va zo‘ravonlik holatlarining oldini olish choralari;
"Mahalla yettiligi" hamkorligi: Jinoyatchilikni keltirib chiqaruvchi sabablar va unga imkon berayotgan shart-sharoitlarni barvaqt aniqlash va bartaraf etishda profilaktika inspektorining mahalla raisi, xotin-qizlar faoli va yoshlar yetakchisi bilan yo‘lga qo‘ygan integratsiyalashgan hamkorlik tizimi.
"Har bir mahallaning xavfsizligi bevosita uning hududida profilaktika ishlarining to'g'ri tashkil etilganligiga bog'liq. Profilaktika inspektori mahallaning har bir ko'chasi, har bir muammoli xonadon dardu tashvishidan doimo xabardor bo'lishi shart. 'Kattabog‘' mahallasida kriminogen vaziyat barqarorligini saqlash, tungi vaqtlarda xavfsizlik choralarini kuchaytirish hamda raqamli kuzatuv tizimlarini kengaytirish kabi masalalar navbatdagi sessiyamizda qat'iy tahlil qilinadi," — deya ta'kidladi deputat.
O‘rganishlar davomida to‘plangan materiallar va doimiy komissiya tomonidan tayyorlangan tahliliy xulosalar Xalq deputatlari Termiz shahar Kengashining navbatdagi sessiyasi kun tartibiga kiritilishi va deputatlar ishtirokida atroflicha muhokama qilinishi belgilab olindi.