Xalq deputatlari Marg‘ilon shahar Kengashi deputati, 2-Saxovat saylov okrugi deputati S. Azizov tomonidan joriy yilning 25-may kuni deputatlik so‘rovi yuborilgan edi. Mazkur so‘rovda Miltiqsozlar mahallasidagi Baraka ko‘chasining yo‘l holatini yaxshilash, xususan, ko‘chani asfaltlashtirish masalasi ko‘tarilgan.

Yillar davomida yo‘lning ta’mirtalab holati mahalla aholisi uchun qator noqulayliklarni keltirib chiqarib kelgan. Ayniqsa, mavsumiy yog‘ingarchiliklar vaqtida piyodalar va transport vositalarining harakatlanishi yanada qiyinlashgan.

Deputat tomonidan ko‘tarilgan ushbu masala tegishli tashkilotlar e’tiboriga yetkazilib, deputatlik so‘rovi asosida zarur chora-tadbirlar belgilandi. Natijada qisqa muddat ichida Miltiqsozlar mahallasi Baraka ko‘chasida keng ko‘lamli asfaltlash ishlari amalga oshirildi.

Bugungi kunda ko‘chaning asfalt qoplamasi yangilanib, aholining piyoda va avtotransport vositalarida xavfsiz hamda ravon harakatlanishi uchun qulay sharoit yaratildi.

Mazkur ishlar, avvalo, fuqarolar murojaatlari va hududdagi mavjud muammolarni o‘z vaqtida aniqlash hamda ularni tegishli tartibda hal etishda deputatlik nazoratining amaliy ahamiyati katta ekanini ko‘rsatmoqda.

Baraka ko‘chasining asfaltlanishi mahalla aholisi uchun shunchaki obodonlashtirish ishlari emas, balki yillar davomida kutilgan muammoning ijobiy yechimi bo‘ldi. Eng muhimi, saylovchilar tomonidan bildirilgan muammo xalq vakili orqali tegishli tashkilotlar e’tiboriga yetkazilib, aniq natija bilan yakunlandi.

Bu kabi amaliy ishlar deputatning o‘z saylov okrugidagi aholi bilan doimiy muloqoti, ularning muammolarini o‘rganishi va ularni hal etish bo‘yicha qat’iy tashabbus ko‘rsatishi naqadar muhim ekanini yana bir bor namoyon etadi.