Deputatlar tuman tibbiyot muassasalarida olib borilayotgan ishlarni o‘rganmoqdalar 

Joriy yil 7
may kuni O‘zbekiston Respublikasi Prezidenti Shavkat Mirziyoev raisligida sog‘liqni
saqlash tizimini takomillashtirishga bag‘ishlab o‘tkazilgan kengaytirilgan yig‘ilishda
belgilangan vazifalar, xususan “90 kunlik o‘zgarishlar vaqti” doirasidagi topshiriqlar
ijrosini ta’minlash maqsadida, Xalq deputatlari Quva tuman Kengashi deputatlari
tumandagi tibbiyot muassasalari faoliyatini o‘rganish ishlarini olib bormoqdalar. 

Shu maqsadda
deputatlar tumandagi bir qator oilaviy poliklinikalarda bo‘lib, ularda amalga oshirilayotgan
qurilish, ta’mirlash va moddiy-texnik bazani mustahkamlash ishlari bilan yaqindan
tanishdilar. 

Xususan, Taxtako‘prik
mahallasidagi “Maslahat-diagnostika” bo‘limi, Gulobod mahalla fuqarolar yig‘ini
hududidagi 2-son oilaviy poliklinika hamda Pastki Xuja Xasan mahalla fuqarolar yig‘inida
joylashgan 10-son oilaviy poliklinikada olib borilayotgan qurilish-ta’mirlash ishlari
ko‘zdan kechirildi. 

 Shuningdek, ta’mirlash jarayonlari o‘rganilib,
aniqlangan kamchiliklar mas’ullarga ko‘rsatildi va ularni bartaraf etish bo‘yicha
tegishli tavsiyalar berildi. 

Qayd etish joizki,
mazkur tashriflar tumanda sog‘liqni saqlash tizimini rivojlantirish, aholiga yaqin
va qulay tibbiy xizmatlarni tashkil etish hamda Prezident topshiriqlarining amaldagi
ijrosini ta’minlashga qaratilgan keng qamrovli ishlarning muhim qismini tashkil
etadi.