Xalq deputatlari Shovot tumani Kengashi deputati Gulxumar Kuranbayevna Dosova tomonidan Shovot tumani maktabgacha va maktab ta’limi bo‘limi boshlig‘i Q.Babojonov nomiga deputatlik so‘rovi yuborildi.
Deputatlik so‘rovi mamlakatimizda maktabgacha ta’lim tizimini yanada rivojlantirish, 3–7 yoshdagi bolalarni maktabgacha ta’lim bilan qamrab olish darajasini oshirish hamda ularga sifatli ta’lim-tarbiya berish bo‘yicha amalga oshirilayotgan ishlarni o‘rganish maqsadida tayyorlandi.
📌 So‘rovda quyidagi masalalar yuzasidan batafsil ma’lumot so‘ralgan:
🔹 Shovot tumanida 3–7 yoshdagi bolalarni maktabgacha ta’lim bilan qamrab olishning amaldagi holati va ko‘rsatkichlari.
🔹 Davlat, nodavlat hamda oilaviy nodavlat maktabgacha ta’lim tashkilotlari kesimida qamrov darajasi.
🔹 Maktabgacha ta’lim bilan qamrab olinmagan bolalar soni hamda bunga sabab bo‘layotgan omillar.
🔹 2026-yilda qamrovni oshirish maqsadida amalga oshirilgan ishlar va erishilgan natijalar.
🔹 Yangi maktabgacha ta’lim tashkilotlarini tashkil etish, mavjudlarini kengaytirish hamda qo‘shimcha quvvatlar yaratish bo‘yicha rejalashtirilgan chora-tadbirlar.
🔹 Sohada mavjud muammolar va ularni bartaraf etish yuzasidan ishlab chiqilgan takliflar.
⚖️ Qonunchilik talabi
Deputat so‘roviga “Xalq deputatlari viloyat, tuman va shahar Kengashi deputatining maqomi to‘g‘risida”gi Qonunning 8-moddasiga muvofiq, so‘rov olingan kundan e’tiboran 10 kun ichida asoslantirilgan javob taqdim etilishi lozim.
📍 Maqsad
Mazkur deputatlik so‘rovi orqali tumanda maktabgacha ta’lim tizimining bugungi holatini chuqur tahlil qilish, mavjud muammolarni aniqlash hamda bolalarni maktabgacha ta’lim bilan qamrab olish darajasini yanada oshirishga qaratilgan taklif va tavsiyalarni ishlab chiqish ko‘zda tutilgan.