Mazkur o‘rganish “Mahalliy davlat hokimiyati to‘g‘risida”gi Qonunning 19¹-moddasida belgilangan doimiy komissiyalarning hududlarda davlat organlari faoliyatini joyiga chiqqan holda o‘rganish, ishchi guruhlar tuzish, mutaxassislarni jalb etish hamda Kengash qarorlari ijrosini nazorat qilish vakolatlari doirasida amalga oshirildi.

💬Shuningdek, Eng muhim qonunlarning mahalliy Kengashlar doimiy komissiyalari kesimidagi taqsimoti asosida ekologiya yo‘nalishida olib borilayotgan ishlar samaradorligini oshirish, hududlarda qabul qilingan qarorlar ijrosini baholash hamda amaliy holatni o‘rganishga alohida e’tibor qaratildi.

💬Ishchi guruh tarkibida Xalq deputatlari Termiz shahar Kengashining 17-“Surxon sohili” saylov okrugi deputati, Agrar, suv xo‘jaligi va ekologiya masalalari bo‘yicha doimiy komissiya raisi Burxon Raxmatullayev, 12-“Saxovat” saylov okrugi deputati, komissiya a’zosi Xayrullo Jurayev, Kengash kotibiyatining bosh mutaxassislari R. Mamashukurov va A. Temirov, shuningdek Termiz shahar Ekologiya, atrof-muhitni muhofaza qilish va iqlim o‘zgarishi bo‘limi hamda Ekopolitsiya mas’ullari ishtirok etdilar.

💬O‘rganish davomida, avvalo, Xalq deputatlari Termiz shahar Kengashining 2023-yil 5-iyundagi VI-61-72-8-121-K/23-son qarori bilan belgilangan vazifalar ijrosiga alohida e’tibor qaratildi. Mazkur qaror asosida shaharning “Guliston” va “Saxovat” mahallalari hududida jami 3 gektar maydonda “Yashil bog‘lar” barpo etish belgilangan bo‘lib, loyiha orqali shaharning ekologik holatini yaxshilash, yashil hududlarni kengaytirish hamda aholining dam olishi uchun qulay maskanlar yaratish ko‘zda tutilgan.

💬Joyiga chiqib o‘tkazilgan o‘rganishlarda yashil hududlarda ekilgan daraxt va manzarali butalarning saqlanish holati, sug‘orish tizimining ishlashi, ko‘chatlarning parvarishi, yashil maydonlarning sanitariya holati, mavjud infratuzilmaning bugungi holati batafsil ko‘zdan kechirildi. Shuningdek, hududlarda qo‘shimcha ko‘chat ekish imkoniyatlari, sug‘orish manbalari va yashil hududlarni kengaytirish bo‘yicha takliflar ishlab chiqildi.

💬Mutaxassislar bilan birgalikda amalga oshirilgan monitoring davomida “Tabiatni muhofaza qilish to‘g‘risida”gi Qonun hamda “O‘simliklarni himoya qilish to‘g‘risida”gi Qonun talablariga rioya etilishi, daraxt va butalarning muhofazasi, ularning noqonuniy kesilishining oldini olish, shuningdek yashil hududlardan oqilona foydalanish masalalari ham atroflicha muhokama qilindi.

💬Deputatlar tomonidan mas’ul tashkilotlar e’tiboriga ko‘chatlarni muntazam sug‘orish, qurib qolish xavfi mavjud daraxtlarni saqlab qolish, yashil hududlarni doimiy parvarish qilish, jamoatchilik nazoratini kuchaytirish hamda “Yashil makon” umummilliy loyihasi doirasidagi ishlarni jadallashtirish yuzasidan tegishli tavsiyalar berildi.

💬O‘rganish jarayonida ekologik barqarorlikni ta’minlash faqatgina mas’ul tashkilotlarning emas, balki mahalla faollari, fuqarolar va jamoatchilikning ham umumiy mas’uliyati ekani alohida ta’kidlandi. Zero, barpo etilgan har bir yashil hudud nafaqat bugungi kun, balki kelajak avlod uchun sog‘lom ekologik muhit yaratishga xizmat qiladi.

🫥Yakunda aniqlangan holatlar yuzasidan tahliliy ma’lumotlar umumlashtirilib, mavjud kamchiliklarni bartaraf etish, qaror ijrosini to‘liq ta’minlash hamda “Yashil bog‘lar” loyihasi samaradorligini oshirish bo‘yicha tegishli taklif va tavsiyalar tayyorlanishi, zarur masalalar Xalq deputatlari Termiz shahar Kengashining Agrar, suv xo‘jaligi va ekologiya masalalari bo‘yicha doimiy komissiyasi muhokamasiga hamda navbatdagi sessiya kun tartibiga kiritilishi belgilandi.