Xalq deputatlari Qo‘qon shahar Kengashi deputati J.Xusanov tomonidan “Qaymoqli guzar” mahallasidagi yo‘l va infratuzilma muammosini bartaraf etish yuzasidan navbatdagi deputatlik so‘rovi yuborildi.

“Qaymoqli guzar” mahallasi hududida o‘tkazilgan deputatlik o‘rganishi davomida aholi uchun noqulaylik va xavf tug‘dirayotgan bir qator kamchiliklar aniqlandi. Xususan, Turkiston ko‘chasidan “Qaymoqli guzar” mahallasiga kirish qismida elektr simlarini yangilash maqsadida olib borilgan kavlash va ta’mirlash ishlari yakunlangan bo‘lsa-da, yo‘lning kavlangan qismi ochiq qoldirilgani hamda asfalt qoplamasi qayta tiklanmagani ma’lum bo‘ldi.

Mazkur holat, ayniqsa, yosh bolalar va piyodalar xavfsizligiga tahdid solayotgani, shuningdek, avtotransport vositalarining harakatlanishiga noqulaylik tug‘dirayotgani sababli deputat tomonidan Qo‘qon shahar hokimi o‘rinbosari M.Mirmaqsudovga deputatlik so‘rovi yuborildi.

Deputatlik so‘rovida mazkur hududda kavlash va elektr simlarini yangilash ishlarini amalga oshirgan mas’ul tashkilot hamda pudratchini aniqlash so‘ralgan.

Shuningdek, Turkiston ko‘chasidan “Qaymoqli guzar” mahallasiga kirish qismidagi kavlangan yo‘l maydonini sifatli va kafolatli tarzda asfaltlab, avvalgi holatiga keltirish, hududni tartibga solish hamda amalga oshirilgan ishlar yuzasidan yozma axborot taqdim etish talab qilingan.

Mazkur masala deputat nazoratiga olingan bo‘lib, qonunchilikda belgilangan 10 kunlik muddatda deputatlik so‘roviga javob taqdim etilishi hamda amalga oshirilgan ishlar yuzasidan qo‘shimcha ma’lumot berib boriladi.

Xalq deputatlari Qo‘qon shahar Kengashi