Xalq deputatlari Nurobod tumani Kengashining navbatdagi sessiyasida Nurobod tumani hududida huquq-tartibotni mustahkamlash, jinoyatchilikning oldini olish va fuqarolar xavfsizligini ta’minlash borasida amalga oshirilgan ishlar yuzasidan tuman ichki ishlar bo‘limi boshlig‘i S. Sharipovning hisoboti eshitildi.

Hisobotda qayd etilishicha, 2026-yilning o‘tgan davrida tumanda jami 110 ta jinoyat ro‘yxatga olingan bo‘lib, oldini olish mumkin bo‘lgan jinoyatlar 2,4 foizga kamaygan. Jinoyat turlari kesimida ijobiy ko‘rsatkichlarga erishilgan:

firibgarlik – 25 foizga (4 tadan 3 taga),

yengil tan jarohati yetkazish – 40 foizga (5 tadan 3 taga),

o‘rtacha og‘ir tan jarohati yetkazish – 100 foizga (1 tadan 0 taga) kamaygan.

Shuningdek, qotillik, bosqinchilik, nomusga tegish va transport vositasini olib qochish kabi og‘ir va o‘ta og‘ir jinoyatlar sodir etilishiga yo‘l qo‘yilmagan.

O‘g‘irlik jinoyatlariga qarshi kurashish yo‘nalishida muhim natijalarga erishildi. Olib borilgan tezkor-qidiruv va profilaktik tadbirlar natijasida 3 ta uyushgan jinoiy guruh fosh etilib, ularning 11 nafar a’zosiga nisbatan qamoq ehtiyot chorasi qo‘llanildi.

 Aniqlanishicha, mazkur guruhlar tomonidan 2026-yil davomida 80 dan ortiq chorva o‘g‘irligi holatlari sodir etilgan. Ko‘rilgan choralar natijasida jabrlangan fuqarolarga:

135 bosh qo‘y,

6 bosh qoramol,

2 bosh ot qaytarib berilgan.

Yoshlar jinoyatchiligini kamaytirish borasida ham sezilarli natijalar qayd etildi. Xususan, o‘tgan yilning mos davrida 13 ta jinoyat sodir etilgan bo‘lsa, joriy yilda bu ko‘rsatkich 1 taga tushgan. Bu esa yoshlar bilan olib borilayotgan manzilli profilaktik ishlarning samaradorligini ko‘rsatadi.

Mahallalar kesimida olib borilgan “Tozalash” tadbirlari, hamkor tashkilotlar bilan birgalikdagi profilaktik ishlar natijasida:

tumandagi 39 ta mahallaning 30 tasida jinoyat sodir etilmagan,

8 tasida jinoyatlar kamaygan.

Shu bilan birga, ayrim kamchiliklar ham mavjud. Jumladan, Saroy va Ma’shal mahallalarida jinoyatchilikni oldini olish bo‘yicha ishlar yetarli darajada yo‘lga qo‘yilmaganligi sababli o‘g‘irlik jinoyatlari yuqori darajada saqlanib qolmoqda.

Kelgusida quyidagi ustuvor vazifalarni amalga oshirish belgilandi:

profilaktik tadbirlar qamrovini kengaytirish;

yoshlar bilan ishlash tizimini yanada takomillashtirish;

oilaviy-maishiy jinoyatlarning barvaqt oldini olish;

kiberjinoyatchilikka qarshi targ‘ibot ishlarini kuchaytirish;

davlat organlari, mahalla va jamoatchilik hamkorligini mustahkamlash.

Mazkur hisobot tuman hududida jinoyatchilikni kamaytirish, aholi xavfsizligini ta’minlash va huquqbuzarliklarning oldini olish borasida tizimli ishlar olib borilayotganini ko‘rsatdi.