📌 Kambag‘allikni qisqartirish bilan bog‘liq masalalar bo‘yicha muvaqqat komissiya yig‘ilishi bo‘lib o‘tdi

Xalq deputatlari Sherobod tumani Kengashi huzuridagi kambag‘allikni qisqartirish bilan bog‘liq masalalar bo‘yicha muvaqqat komissiyaning navbatdagi yig‘ilishi bo‘lib o‘tdi. Yig‘ilishda komissiya raisi A. Choriyev hamda komissiya a’zolari, mas’ul tashkilot va idoralar vakillari ishtirok etdilar.

Yig‘ilish kun tartibiga muvofiq, O‘zbekiston Respublikasi Oliy Majlisi Senati Kengashining 2024-yil 29-noyabrdagi “Kambag‘allikni qisqartirish bo‘yicha belgilangan ustuvor vazifalarning bajarilishini nazorat qilish chora-tadbirlari to‘g‘risida”gi KQ-6-V-son qarori ijrosini ta’minlash yuzasidan tumanda amalga oshirilayotgan ishlar muhokama qilindi.

Majlis davomida mas’ul mutasaddilar tomonidan tumanda kambag‘allikni qisqartirish, aholi bandligini ta’minlash, tadbirkorlikni rivojlantirish, ijtimoiy himoyaga muhtoj oilalarni qo‘llab-quvvatlash hamda ularning daromad manbalarini oshirish borasida amalga oshirilayotgan chora-tadbirlar yuzasidan axborotlar berildi.

Shuningdek, hududlarda “mahallabay” ishlash tizimi asosida kam ta’minlangan oilalar bilan manzilli ishlash, ularni kasb-hunarga o‘qitish, imtiyozli kreditlar ajratish, subsidiyalar orqali o‘zini o‘zi band qilishga ko‘maklashish masalalariga alohida e’tibor qaratildi. Ayrim yo‘nalishlarda mavjud muammolar va kamchiliklar ham tahlil qilinib, ularni bartaraf etish yuzasidan tegishli taklif va tavsiyalar bildirildi.