Bugun O‘zbekiston va Yevropa Ittifoqi o‘rtasida Kengaytirilgan sheriklik va hamkorlik to‘g‘risidagi tarixiy bitim imzolandi.

Bu nafaqat diplomatik muvaffaqiyat, balki mamlakatimiz taraqqiyot yo‘lida yangi strategik bosqich boshlanganini anglatadi.

Mazkur bitim O‘zbekistonning so‘nggi yillardagi ochiqlik, yangilanish va islohotlar siyosatining mantiqiy davomi bo‘lib, bizni Yevropa davlatlari bilan siyosiy, iqtisodiy, ijtimoiy va madaniy sohalarda teng sherik sifatida bog‘laydi.

 Iqtisodiyotda — yangi investitsiyalar, innovatsion texnologiyalar va “yashil” energiya loyihalari uchun keng yo‘l ochiladi.

  Ta’lim va ilm-fanda — Yevropa standartlariga yaqin dasturlar, talaba va o‘qituvchilar almashinuvi, malaka oshirish imkoniyatlari kengayadi.

   Ekologiya va atrof-muhitni muhofaza qilishda — Yevropa tajribasidan foydalanish, suv va yer resurslarini asrash, barqaror rivojlanish tamoyillarini amalda joriy etish imkoni yaratiladi.

   Ijtimoiy va huquqiy sohada — inson huquqlarini ta’minlash, gender tengligini mustahkamlash va fuqarolik jamiyatini rivojlantirish bo‘yicha yangi tashabbuslar hayotga tatbiq etiladi.

Tuman deputati sifatida men ushbu bitimni mahalliy darajadagi islohotlarni chuqurlashtirish, hududlarimizni iqtisodiy va madaniy jihatdan yuksaltirish uchun ulkan imkoniyat deb bilaman.

Endi bizga eng muhim vazifa – bu imkoniyatlarni amalda ro‘yobga chiqarish, xalqimiz manfaatiga xizmat qiladigan loyihalarni ilgari surishdir.

Shubhasiz, bugungi tarixiy bitim — O‘zbekistonning xalqaro nufuzini mustahkamlab, “Yangi O‘zbekiston – Yangi bosqichda” shiorining amaliy ifodasiga aylangan yirik qadamdir.

Xalq deputatlari Koʼkdala tuman kengashi deputati Musharraf Nurqobilova