Bugun Xalq deputatlari Payariq tumani Kengashi raisi I.Jabborov boshchiligida navbatdagi fuqarolar qabuli bo‘lib o‘tdi. Ochiq muloqot shaklida o‘tgan ushbu tadbirda fuqarolarning ijtimoiy, huquqiy, kommunal-maishiy yo‘nalishlardagi muammo va takliflari tinglandi.

Qabul davomida aholining turmush sharoitini yaxshilash, ichimlik suvi ta’minoti, elektr energiyasi, yo‘l infratuzilmasi, ijtimoiy yordam, ish bilan ta’minlash kabi masalalar ko‘tarildi. Shuningdek, fuqarolar tomonidan qonunchilikdagi ayrim o‘zgarishlar yuzasidan tushuntirishlar so‘raldi.

Murojaatlar e’tibor bilan ko‘rib chiqilib, ayrim masalalar joyida hal etildi. Yechimini talab qiladigan holatlar esa tegishli tashkilotlar bilan hamkorlikda o‘rganilib, amaliy choralar ko‘rilishi belgilandi.

Tuman Kengashi raisi I.Jabborov bunday uchrashuvlar aholining muammolarini bevosita eshitish va ularni hal etish yo‘lida muhim platforma ekanini ta’kidlab, qabul doirasida ko‘tarilgan har bir masala e’tibordan chetda qolmasligini bildirdi.

Shu kabi qabullar muntazam o‘tkazilib, fuqarolarning murojaatlari asosida aniq natijalar sari harakat qilinmoqda.