Termiz shahrida ko‘p qavatli uylarda istiqomat qiluvchi aholi uchun munosib, toza va xavfsiz yashash sharoitlarini yaratish, uylar tutash hududlarini obodonlashtirish borasidagi deputatlik va viloyat Kengashi nazorati izchil davom ettirilmoqda.

Xalq deputatlari Surxondaryo viloyat Kengashi kotibiyati mudiri Sh.Boyqulov, Termiz shahar Kengashi kotibiyati mudiri, deputat A.Ashurov, Kengash kotibiyati bosh mutaxassisi A.Temirov hamda 4-“Bo‘ston” saylov okrugi deputati G.Abramatovalar okrugga qarashli “Bo‘ston” mahallasida bo‘ldilar.

Mas’ullar va deputat mahalladagi ko‘p qavatli uylar atrofida amalga oshirilgan va bajarilishi lozim bo‘lgan obodonlashtirish hamda sanitariya-tozalik ishlarini bevosita joyiga chiqqan holda ko‘zdan kechirdilar.

Mazkur nazorat-tahlil jarayoni Oliy Majlis Senati tomonidan mahalliy Kengash deputatlari faoliyati uchun belgilangan “Mahalliy Kengash deputati faoliyatining eng muhim 24 ta yo‘nalishi” mezonlari asosida tashkil etilib, bevosita uning 13-bandida belgilangan — Boshqaruv servis kompaniyalari (BSK) faoliyati samaradorligi, ko‘p qavatli uylarning ichki yo‘laklari (pod’yezdlari), yerto‘lalari, uylar atrofidagi maydonlar tozaligi va yoritilishi holatini o‘rganish vazifasi ijrosiga qaratildi.

Mas’ullar ko‘p qavatli uylar tutash hududlarida bo‘lib:

• Sanitariya va tozalik: Uylar atrofidagi maishiy chiqindilarni o‘z vaqtida olib chiqish hamda BSK tomonidan ko‘chalarni toza saqlash holati;

• Yashil hududlar va sug‘orish: Uylar atrofidagi yashil maydonlar, manzarali daraxtlar parvarishi va sug‘orish tizimlari;

• Tungi yoritish va infratuzilma: Ko‘p qavatli uylar oldidagi yoritish chiroqlari hamda bolalar o‘yingohlarining xavfsizligi tahlil qilindi.

O‘rganishlar yakunida aniqlangan ayrim kichik kamchiliklarni bartaraf etish, Boshqaruv servis kompaniyalari xizmat sifatini oshirish hamda uylar atrofidagi obodonchilikni doimiy saqlab qolish bo‘yicha mas’ul korxonalar va mahalla faollariga tegishli ko‘rsatma hamda deputatlik tavsiyalari berildi.