Xalq deputatlari Qo‘shko‘pir tumani Kengashining Reglament va deputatlik odob-axloqi masalalari bo‘yicha doimiy komissiyasi tomonidan navbatdagi yig‘ilish o‘tkazildi.

Yig‘ilishda O‘zbekiston Respublikasi Oliy Majlisi Senatining 2026-yil 14-avgustdagi “Xalq deputatlari viloyat, tuman, shahar Kengashi deputatlarining namunaviy odob-axloq qoidalariga o‘zgartirish kiritish to‘g‘risida”gi KQ-379-V-sonli qarori mazmun-mohiyati va undan kelib chiqadigan vazifalar muhokama qilindi.

Muhokama davomida deputatlarning o‘z vakolatlarini amalga oshirish jarayonida qonuniylik, xolislik, mas’uliyat, halollik va odob-axloq tamoyillariga qat’iy rioya etishi, fuqarolar bilan muloqotda yuksak muomala madaniyatini namoyon qilishi hamda deputatlik maqomiga munosib faoliyat yuritishi masalalariga alohida e’tibor qaratildi.

Shuningdek, namunaviy odob-axloq qoidalaridagi o‘zgartirishlarning mazmuni deputatlarning huquq va majburiyatlari, jamoatchilik oldidagi mas’uliyati hamda xalq manfaatlarini ifodalashdagi siyosiy va huquqiy mas’uliyatini yanada oshirish nuqtayi nazaridan ko‘rib chiqildi.

Doimiy komissiya tomonidan mazkur talablarning deputatlar faoliyatida amaliy ijrosini ta’minlash, Kengash faoliyatida ochiqlik, mas’uliyat va deputatlik madaniyatini yanada mustahkamlash yuzasidan tegishli vazifalar belgilab olindi.

Slide 1 of 1