#deputat_soʻrovi #poytaxtdeputatlari #deputatlik_faoliyati

❗️ Deputatlik so‘rovlari orqali “Yashil iqtisodiyot” va ekologik islohotlar ijrosi yuzasidan nazorat kuchaytirilmoqda

🏛 Xalq deputatlari Toshkent shahar Kengashi deputati Madjid Taxirov tomonidan “Yashil iqtisodiyot” tamoyillarini amaliyotga keng joriy etish, qayta tiklanuvchi energiya manbalaridan samarali foydalanish hamda ekologik islohotlar ijrosi ustidan nazoratin kuchaytirish maqsadida Toshkent shahar Ekologiya, atrof-muhitni muhofaza qilish va iqlim o‘zgarishi boshqarmasi boshlig‘i A.Rasulov hamda Toshkent shahar hokimining qurilish, to‘siqsiz muhit yaratish, kommunikatsiyalarni rivojlantirish, ekologiya va ko‘kalamzorlashtirish masalalari bo‘yicha birinchi o‘rinbosari B.S.Raxmonov nomiga deputatlik so‘rovlari yuborildi.

🌱 Deputatlik so‘rovlarida so‘nggi yillarda mamlakatimizda “Yashil iqtisodiyot”ga o‘tish, energiya samaradorligini oshirish, uglerod chiqindilarini kamaytirish, ekologik xavfsizlikni mustahkamlash hamda qayta tiklanuvchi energiya manbalaridan foydalanishni kengaytirishga qaratilgan davlat siyosati va qabul qilingan normativ-huquqiy hujjatlar ijrosi yuzasidan tahliliy ma’lumotlar taqdim etish so‘ralgan.

📝 Xususan, Toshkent shahrida sanoat tarmoqlarida “Yashil sertifikat”lar bozorini shakllantirish, mahsulotlarni ekologik markirovkalash tizimini joriy etish, nasos stansiyalarida quyosh va boshqa qayta tiklanuvchi energiya manbalarini o‘rnatish, buning natijasida elektr energiyasi iste’molini qisqartirish va iqtisodiy samaradorlikni oshirish bo‘yicha amalga oshirilgan ishlar yuzasidan batafsil axborot taqdim etish talab etilgan.

🔺 Shuningdek, deputat tomonidan Toshkent shahrida davlat-xususiy sheriklik mexanizmlari asosida qayta tiklanuvchi energiya loyihalarini amalga oshirish, energiya samaradorligini oshirish bo‘yicha yaratilgan rag‘batlantirish choralarining natijadorligi, zamonaviy energiya tejamkor texnologiyalarni joriy etish orqali nasos stansiyalarini bosqichma-bosqich muqobil energiya manbalariga o‘tkazish, ushbu yo‘nalishdagi moliyalashtirish manbalari, mavjud muammolar va istiqboldagi rejalar haqida ham asoslantirilgan ma’lumot berish so‘ralgan.

📊 Bundan tashqari, deputatlik so‘rovlarida sohada amalga oshirilayotgan islohotlarning amaliy natijalari, mavjud muammo va kamchiliklar, ularni bartaraf etish bo‘yicha takliflar hamda ekologiya va “Yashil iqtisodiyot” yo‘nalishidagi qonunchilikni yanada takomillashtirish yuzasidan tahliliy xulosalarni taqdim etish masalasi ham ko‘tarilgan.

📁 Mazkur deputatlik so‘rovlari “Xalq deputatlari viloyat, tuman va shahar Kengashi deputatining maqomi to‘g‘risida”gi Qonunning 5 va 8-moddalariga muvofiq yuborilgan bo‘lib, mas’ul tashkilot rahbarlaridan barcha masalalar yuzasidan asoslantirilgan tahliliy ma’lumotlar, statistik ko‘rsatkichlar hamda ko‘rilayotgan chora-tadbirlar to‘g‘risida qonunchilikda belgilangan 10 kun muddatda yozma javob taqdim etish so‘ralgan.

🤝 Mazkur masalalar deputat tomonidan alohida nazoratga olingan.

📱 Telegram 📱 Instagram 📱 Facebook 📱 YouTube 🔎 E-kengash