СОҒЛОМ ТУРМУШ ТАРЗИ УЧУН ЯНА БИР МУҲИМ ҚАДАМ

Халқ депутатлари Уйчи туман Кенгаши 7-Ёркатай сайлов округи депутати А.Муйдинов ташаббуси билан Ёркатай маҳалласида аҳоли саломатлигини мустаҳкамлаш, соғлом турмуш тарзини тарғиб қилиш ҳамда аҳоли учун қулай шарт-шароитлар яратиш борасида қатор амалий ишлар олиб борилмоқда.
Уйчи туманида амалга оширилаётган ишлар натижасида 15 та маҳалла ҳудудида жами 30 километр масофада «Хавфсиз йўлак» ва «Саломатлик йўлакчаси» барпо этилди.
Бугун ушбу йўлакларда эрталаб ва кечки пайт пиёда сайр қилаётган фуқаролар сони тобора ортиб бормоқда. Йўлаклар бўйлаб қулай ўриндиқларнинг ўрнатилгани, замонавий тунги ёритиш тармоқларининг йўлга қўйилгани аҳоли учун янада қулай шароит яратмоқда.
Шунингдек, маҳаллаларда барпо этилган воркаут майдончалари ёшлар ва болажонларнинг бўш вақтини мазмунли ўтказиши, спорт билан мунтазам шуғулланиши учун муҳим масканга айланмоқда.
Айниқса, Ёркатай маҳалласидаги воркаут майдончасида болажонларнинг қувноқ машғулотлари ҳудудга янада файз бағишлаб, соғлом ва фаол ҳаёт тарзини шакллантиришга хизмат қилмоқда.
Бу каби амалий ташаббуслар аҳоли саломатлигини асраш, ёшлар ўртасида спортни оммалаштириш ва маҳаллаларда соғлом муҳитни янада мустаҳкамлашда муҳим аҳамият касб этмоқда.
Соғлом ҳаёт — фаровон келажак гарови