Xalq deputatlari Olmazor tumani Kengashi deputati Abdujalil Xasanov 2026-yilning ikkinchi choragi bo‘yicha axborot berdi

🏛 Xalq deputatlari Olmazor tumani Kengashi deputati Abdujalil Xasanov 10-"Ahil" saylov okrugi saylovchilari bilan navbatdagi uchrashuv o‘tkazib, 2026-yilning ikkinchi choragi davomida amalga oshirilgan ishlar yuzasidan axborot taqdim etdi. Tadbirda Olmazor tumani hokimligi mas’ul xodimlari, mahalla fuqarolar yig‘inlari raisi, "mahalla yettiligi" vakillari, ko‘chaboshilar, uyboshilar hamda faol fuqarolar ishtirok etdi.

📝 Ta’kidlanganidek, deputat hisobot davrida Olmazor tumani Kengashining 3 ta sessiyasi hamda 5 ta doimiy komissiya yig‘ilishida faol ishtirok etib, hududlarni ijtimoiy-iqtisodiy rivojlantirish, aholi salomatligini mustahkamlash, obodonlashtirish, yo‘l infratuzilmasini yaxshilash va fuqarolar murojaatlarini samarali hal etishga qaratilgan masalalar yuzasidan o‘z takliflarini ilgari surdi.

🗣 Hisobotda qayd etilishicha, 10-"Ahil" saylov okrugiga kiruvchi 2 ta mahallada deputatlik faoliyati tizimli yo‘lga qo‘yilgan. Mahalla fuqarolar yig‘inlari binolariga deputat qabuli jadvali hamda murojaatlar uchun aloqa ma’lumotlari joylashtirilgan. Ikkinchi chorak davomida 3 ta sayyor qabul tashkil etilib, ularda 33 nafardan ortiq fuqaro bilan uchrashuvlar o‘tkazildi. Fuqarolardan kelib tushgan 7 ta murojaat va taklif o‘rganilib, ularni bartaraf etish yuzasidan tegishli tashkilotlar bilan hamkorlikda amaliy choralar ko‘rildi.

📉 Deputat tomonidan hisobot davrida 3 ta deputatlik so‘rovi tegishli davlat organlariga yuborildi. Jumladan, Olmazor tumani “Ahil” MFY “Orif Xatamov” ko‘chasi hududida elektr energiyasi iste’moli keskin ortgani sababli mavjud transformatorning quvvati yetarli bo‘lmayotgani, buning natijasida elektr ta’minotida uzilishlar hamda kuchlanishning pasayishi holatlari tez-tez kuzatilayotgani, ayniqsa yuqori yuklama vaqtlarida aholi elektr energiyasidan uzluksiz foydalanishida muammolar yuzaga kelayotgani qayd etilgan. Mazkur mavjud transformatorning texnik holati va yuklama darajasiga baho berishingizni hamda zarurat mavjud bo‘lgan taqdirda mahalla hududiga qo‘shimcha transformator o‘rnatish masalasini qonunchilikda belgilangan tartibda ko‘rib chiqilishi qayd etilgan.

🔺 Hisobot davomida 10-"Ahil" saylov okrugidagi 2 ta mahalla "yettiligi" faoliyati ham atroflicha o‘rganilgani, ularning ish samaradorligi tahlil qilinib, aniqlangan kamchiliklarni bartaraf etish yuzasidan tavsiyalar ishlab chiqilgani ta’kidlandi.

📋 Yakunda deputat saylovchilar bilan ochiq muloqotni izchil davom ettirish, hududlarda aniqlanayotgan muammolarni mutasaddi tashkilotlar bilan hamkorlikda bartaraf etish hamda aholi manfaatlarini ta’minlash deputatlik faoliyatining ustuvor yo‘nalishlaridan biri bo‘lib qolishini alohida ta’kidladi.