Bozataw rayonı jaslar orayı imaratında Xalıq deputatları Bozataw rayonlıq Keńesi 1-sanlı «Palwash ataw» saylaw okruginen (MTDP) saylanǵan deputat, rayonlıq Keńes sekretariatı baslıǵı A.Ibragimov Mákeme basshıları hám “Máhálle jetiligi” menen ushırasıw ótkerildi.

Dáslep ótken sessiyada deputatlar saylawshılarǵa esabat beriw rejesin tastıyıqlaw haqqındaǵı qararǵa toqtalıp ótti.

Onda deputatlardıń saylawshılar aldındaǵı esap beriw procesin tártipli ótkeriw, Húkmet qararların mazmunın keń jámiyetshilikke jetkeriw, bul boyınsha mákeme hám máhálle jetekshileri menen birgelikte jumıs alıp barıw máseleleri keńnen dodalandı.
Sonday-aq, esabat beriw ushırasıwların joqarı dárejede shólkemlestiriw, puqaralardıń máseleleri, mashqalaların estiw hám olardıń sheshimin támiyinlewde birgeliktegi jumıstı kúsheytiw boyınsha tiyisli tapsırmalar berildi.
Ushırasıw dawamında "Máhálle jetiligi"niń bul processtegi ornı da keńnen dodalandı. Ásirese, saylawshılardı esap beriw ushırasıwlarına keńnen tartıw, puqaralardıń áhmiyetli múrájatların aldınnan úyreniw, sociallıq hám infrastrukturalıq mashqalalardı anıqlaw, olardı deputatlar hám tiyisli uyımlar menen birgelikte sheshiw boyınsha pikir alısıw boldı.
Sonday-aq, mákeme basshıları óz tarawlarında ámelge asırılıp atırǵan jumıslar haqqında málimleme berip, deputatlar menen óz-ara birge islesiwdi jáne de kúsheytiw, saylawshılardan kelip túsken múrájatlardı tez hám sapalı kórip shıǵıw, olardıń nızamlı mápleri boyınsha usınısların bildirdi.
Ushırasıw ashıqtan-ashıq sóylesiw túrinde ótip, qatnasıwshılar tárepinen deputatlardıń esap beriw jumısların nátiyjeli shólkemlestiriw, puqaralar menen turaqlı baylanıstı jolǵa qoyıw, múrájatlar menen islesiw sapasın jaqsılaw hám aymaqlardaǵı áhmiyetli máselelerdi birgelikte sheshiwge qaratılǵan bir qatar usınıslar ortaǵa taslandı.
Ilaj sońında deputatlardıń saylawshılar aldındaǵı esap beriw ushırasıwların belgilengen grafik tiykarında joqarı dárejede shólkemlestiriw, puqaralardıń usınıs hám múrájatları tiykarında ámeliy jumıslardı jedellestirgen halda alıp barıw boyınsha tiyisli wazıypalar belgilenip, qatnasıwshılarǵa tiyisli tapsırmalar berildi.