MUNOSABAT:Tuproqni muhofaza qilish va uning unumdorligini oshirish to‘g‘risidagi qonun – yer resurslaridan oqilona foydalanishning muhim huquqiy asosi bo'lib xizmat qiladi.

O‘zbekiston Respublikasining 2024-yil 2-fevralda qabul qilingan “Tuproqni muhofaza qilish va uning unumdorligini oshirish to‘g‘risida”gi O‘RQ–903-sonli Qonuni yer resurslarini asrash, tuproq unumdorligini saqlash va oshirish hamda ekologik barqarorlikni ta’minlashga qaratilgan muhim huquqiy hujjat hisoblanadi.
Mazkur Qonunning mohiyati yuzasidan Xalq deputatlari Angor tumani Kengashi deputati Baxromov Isoxon Nosirovich o‘z munosabatini bildirib shunday dedi.Tuproq qishloq xo‘jaligi va oziq-ovqat xavfsizligining asosiy manbai hisoblanadi. Shu bois tuproqni muhofaza qilish, uning degradatsiyasi va sho‘rlanishining oldini olish, unumdorligini oshirish bugungi kunning eng muhim vazifalaridan biridir.

O‘RQ–903-sonli Qonun orqali tuproq resurslarini muhofaza qilish, ulardan oqilona foydalanish hamda yerlarning meliorativ holatini yaxshilash bo‘yicha aniq huquqiy mexanizmlar belgilab berildi. Bu esa qishloq xo‘jaligi mahsulotlari yetishtirish samaradorligini oshirish, ekologik muvozanatni saqlash va kelajak avlodlar uchun yer resurslarini asrab-avaylashga xizmat qiladi.