“Chorchinor” mahalla fuqarolar yig‘inida yoshlarning bo‘sh vaqtlarini mazmunli tashkil etish, ularni sportga keng jalb qilish hamda sog‘lom turmush tarzini targ‘ib etish maqsadida navbatdagi ezgu tashabbus amalga oshirildi.

Xalq deputatlari Qo‘qon shahar Kengashi deputati Y.To‘ychiyev tashabbusi hamda saxovatpesha homiylar ko‘magida mahalla hududida bolalar uchun karate sport seksiyasi tashkil etildi.

Avvalroq mahallada sport to‘garaklarini tashkil etish uchun mos joy va zarur sharoitlarning yetishmasligi muammo bo‘lib kelayotgan edi. Deputatning tashabbuskorligi va homiylarning amaliy yordami natijasida mashg‘ulotlar o‘tkazish uchun maxsus joy ajratilib, sport bilan shug‘ullanish uchun qulay shart-sharoitlar yaratildi.

Karate sport seksiyasining ochilish marosimi ko‘tarinki ruhda o‘tdi. Tadbir davomida yosh sportchilar o‘zlarining ilk mahorat chiqishlarini namoyish etib, ota-onalar va mahalla faollarida katta taassurot qoldirdilar.

Ayniqsa, bolajonlarning sportga bo‘lgan qiziqishi, intilishi va ko‘zlaridagi quvonch tadbir ishtirokchilariga alohida kayfiyat ulashdi. Ota-onalar esa farzandlari uchun yaratilayotgan imkoniyatlardan mamnun ekanliklarini bildirib, tashkilotchilar va homiylarga o‘z minnatdorchiliklarini izhor etdilar.

Ta’kidlanganidek, yoshlarni sportga jalb qilish, ularning bo‘sh vaqtini mazmunli tashkil etish hamda sog‘lom va barkamol avlodni voyaga yetkazish borasidagi bunday tashabbuslar kelgusida ham izchil davom ettiriladi.

Mazkur sport seksiyasining tashkil etilishi mahallada sog‘lom muhitni shakllantirish, yoshlarning sportga qiziqishini oshirish hamda ularni turli salbiy illatlardan asrashda muhim ahamiyat kasb etadi.

Xalq deputatlari Qo‘qon shahar Kengashi