Xalıq deputatları Bozataw rayonlıq Keńesi sekretariatı baslıǵı 1-sanlı “Palwash ataw” saylaw okruginen (ÓzMTDP) deputat A.Ibragimov hám 6-sanlı “Andjan” saylaw okruginen (ÓzXDP) deputat SH.Berdaxovlar rayonlıq Qánigelestirilgen mektebinde boldı. 

Mektepte oqıw isleri boyınsha direktor orınbasarı M.Turdimuratov kútip aldı hámde deputatlardı mekteptiń ishki resurisları, oqıwshılardıń jetiskenlikleri menen jaqınan tanıstırdı. 

Deputatlar dáslep sport zallarınıń sharayatları menen tanıstı. 

Úyreniw dawamında mektepte jaslardıń dene-tárbiya hám sport penen shuǵıllanıwı ushın jaratılǵan imkaniyatlar, sport zalınıń jaǵdayı, bar inventarlar hám olardıń jeterlilik dárejesi kózden ótkerildi. Sonıń menen birge, oqıwshılardıń sportqa bolǵan qızıǵıwshılıǵı hám olardı qollap-quwatlaw baǵdarında ámelge asırılıp atırǵan jumıslar tallandı. 

Bul úyreniwden tiykarǵı maqset - bilimlendiriw mákemelerinde salamat turmıs tárizin úgit-násiyatlaw, oqıwshılar ushın zamanagóy hám qolaylı sport sharayatların jaratıw, bar bolǵan mashqalalardı anıqlap, olardı saplastırıwdan ibarat. 

Bunnan soń deputatlar shaxmat múyeshi hámde ruwxiy aǵartıwshılıq múyeshleri menen jaqınnan tanıstı. 

Úyreniw procesinde mekteptiń materiallıq-texnikalıq bazası, shınıǵıwlardıń sapası, denetárbiya muǵallimleriniń jumısı hám jas sporchılar ushın jaratılǵan sharayatlar tallandı. Sonday-aq, sport infrastrukturasın bunnan bılay da rawajlandırıw, qábiletli jaslardı qollap-quwatlaw máselelerine ayrıqsha itibar qaratıldı. 

Úyreniw juwmaqları boyınsha juwapkerler menen sáwbetlesiw dawamında bar jaǵday boyınsha pikir alısılıp, anıqlanǵan ayırım máseleler boyınsha tiyisli usınıslar berildi.