Kambag‘allikni qisqartirish yuzasidan mahalla yettiligi bilan uchrashuv

Xalq deputatlari Sherobod tumani Kengashining 6-Navbur–Dehqonariq saylov okrugi deputati M. Madarqulov tashabbusi bilan O‘zbekiston Respublikasi Oliy Majlisi Senati Kengashining “Kambag‘allikni qisqartirish bo‘yicha belgilangan ustuvor vazifalarning bajarilishini nazorat qilish chora-tadbirlari to‘g‘risida” 2024-yil 29-noyabrdagi KQ-6-V-son qarori ijrosini ta’minlash maqsadida uchrashuv tashkil etildi.

Uchrashuv doirasida Dehqonariq va Navbur mahalla fuqarolar yig‘inlarining “mahalla yettiligi” a’zolari ishtirokida hududdagi kambag‘allik reyestriga kiritilgan oilalarning holatini o‘rganish, ularning daromad darajasini tahlil qilish hamda daromadi oshgan va o‘zini o‘zi ta’minlay oladigan oilalarni reyestrdan chiqarish masalalari yuzasidan fikr almashildi.

Tadbir davomida mahallalarda kambag‘allik reyestrida qayd etilgan fuqarolar sonini MFY aholisi soniga nisbatan 4 foizgacha qisqartirish bo‘yicha aniq rejalar ishlab chiqildi. Shuningdek, belgilangan vazifalarning o‘z vaqtida va samarali amalga oshirilishini ta’minlash maqsadida muntazam monitoring olib borilishi belgilab qo‘yildi.