Deputatlar tumandagi tibbiyot muassasalarida olib borilayotgan qurilish ishlarini o‘rganishni
davom ettirmoqdalar 

O‘zbekiston Respublikasi Prezidenti
Shavkat Mirziyoev raisligida sog‘liqni saqlash tizimini takomillashtirishga bag‘ishlab
o‘tkazilgan kengaytirilgan yig‘ilishda belgilab berilgan vazifalar, jumladan
“90 kunlik o‘zgarishlar vaqti” doirasidagi topshiriqlar ijrosini ta’minlash maqsadida,
Xalq deputatlari Quva tuman Kengashi deputatlari tomonidan tumandagi tibbiyot muassasalarida
olib borilayotgan qurilish ishlarini o‘rganish ishlari izchil davom ettirilmoqda. 

Shu doirada deputatlar Yangi hayot
mahalla fuqarolar yig‘ini hududida joylashgan 4-son oilaviy poliklinikada
“Hamkor-House SSS” mas’uliyati cheklangan jamiyat tomonidan amalga oshirilayotgan
qurilish jarayonlari bilan tanishdilar. 

O‘rganishlar jarayonida ma’lum
bo‘lishicha, binoning birinchi qavatida suvoqlash hamda xonalarni ajratish devorlarini
ko‘tarish ishlari olib borilayotgan, ikkinchi qavatida esa plita yotqizishga tayyorgarlik
ishlari ketmoqda. Qurilish ishlari sifatli amalga oshirilayotgani ta’kidlandi. Shu
bilan birga, deputatlar qurilish mas’ullariga sovuq kunlar boshlanguncha barcha
ishlarini tez va sifatli yakunlash zarurligi haqida tegishli tavsiyalar berdilar. 

Shuningdek, deputatlar poliklinika
faoliyati vaqtincha ko‘chirilgan binodagi sharoitlar bilan ham tanishib, tibbiy
xodimlar hamda kunduzgi bo‘limda davolanayotgan bemorlar bilan suhbatlashdilar.
Ular bemorlarga ko‘rsatilayotgan birinchi tibbiy yordam, dori–darmon ta’minoti holati
bilan qiziqib, tibbiy xodimlarga tegishli tavsiyalar berdilar. 

Qayd etish joizki, mazkur tashriflar
tumanda sog‘liqni saqlash tizimini yanada rivojlantirish, aholiga qulay va sifatli
tibbiy xizmat ko‘rsatish hamda Prezident topshiriqlarining samarali ijrosini ta’minlashga
qaratilgan keng qamrovli ishlarning muhim qismi hisoblanadi.