Xalq deputatlari Qo‘qon shahar Kengashi deputati Sh.Nazarova tomonidan fuqarolar murojaatini ijobiy hal etish hamda ijtimoiy himoyaga muhtoj oilani qo‘llab-quvvatlash maqsadida navbatdagi deputatlik so‘rovi yuborildi.

Mazkur deputatlik so‘rovi Qo‘qon shahar “Vaqf Chorsu” mahalla fuqarolar yig‘ini hududidagi Jasorat ko‘chasi 29-uyda istiqomat qiluvchi, boquvchisini yo‘qotgan yolg‘iz ona Soliyeva Bashoratning yashash uyi ta’mirtalab holatga kelgani yuzasidan fuqaroning murojaati asosida tayyorlandi. Fuqaro nogironligi bo‘lgan farzandi bilan istiqomat qilayotgani inobatga olinib, uning yashash sharoitlarini yaxshilash masalasi deputat tomonidan alohida nazoratga olindi.

Deputatlik so‘rovi Qo‘qon shahar “Inson” ijtimoiy xizmatlar markazi boshlig‘i nomiga yo‘llanib, fuqaroning uy-joyini ta’mirlash bo‘yicha amalga oshiriladigan ishlar, ularning muddatlari hamda ko‘rsatiladigan amaliy yordam yuzasidan asoslantirilgan rasmiy ma’lumot taqdim etish so‘raldi.

Deputatlik so‘rovi orqali ehtiyojmand oilalarni qo‘llab-quvvatlash, ijtimoiy himoyaga muhtoj fuqarolarning turmush sharoitlarini yaxshilash hamda ularning murojaatlarini qonunchilik asosida o‘z vaqtida hal etishga ko‘maklashish maqsad qilingan.

Mazkur masala deputat nazoratiga olingan bo‘lib, uning ijrosi va ko‘rilayotgan choralar yuzasidan qo‘shimcha ma’lumotlar jamoatchilikka muntazam ravishda yetkazib boriladi.

🇺🇿Xalq deputatlari Qo‘qon shahar Kengashi