“Nurli kelajak” mahallasidagi qizg‘in uchrashuvdan so‘ng, Xalq deputatlari Termiz shahar Kengashi raisi D.Normuradova, deputat T.Berdiyev hamda sohaga daxldor barcha mas’ul rahbarlar aholi bilan yuzma-yuz muloqotni davom ettirdilar.

Samimiy va ochiq ruhda o‘tgan ushbu sayyor qabulda har bir fuqaroning murojaatiga manzilli va alohida e’tibor qaratildi.

Muloqot davomida mahalla ahlining turmush sharoitini yaxshilash, hududni har tomonlama rivojlantirish hamda ijtimoiy ko‘mak ko‘rsatish bo‘yicha quyidagi aniq murojaat va takliflar kelib tushdi:

• Ichki yo‘llarni ta’mirlash: Mahallani obod qilish, piyodalar va transport vositalarining harakatlanishiga qulaylik yaratish maqsadida ichki ko‘chalarga qum-shag‘al yotqizish va asfaltlash ishlari;

• Tungi yoritish tizimi: Mahalla ko‘chalarining xavfsizligini ta’minlash va tungi vaqtda aholiga qulaylik yaratish maqsadida zamonaviy yoritish chiroqlarini o‘rnatish;

• Uy-joylarni ta’mirlash: Ijtimoiy himoyaga muhtoj, kam ta’minlangan va boquvchisini yo‘qotgan xonadonlarning yashash sharoitlarini yaxshilash maqsadida uy-joylarini ta’mirlashda amaliy ko‘mak berish;

• Sog‘liqni tiklash uchun tibbiy-moddiy yordam: Surunkali kasalligi bor, dori-darmon va tibbiy muolajaga muhtoj bo‘lgan bir guruh fuqarolarga sog‘lig‘ini tiklashlari uchun moddiy ko‘mak ajratish.

Taqdim etilgan har bir murojaat shunchaki eshitib qo‘yilmadi, balki deputat T.Berdiyevning “murojaat daftari”ga batafsil qayd etildi.

Ushbu masalalarni, xususan, yo‘l, tungi yoritish va uy-joy muammolarini qisqa muddatlarda tizimli hal etish maqsadida daxldor mutasaddi tashkilotlar hamda shahar hokimligining tegishli bo‘limlariga rasmiy deputatlik so‘rovlari yuborilishi belgilab olindi.

Xalq vakillari ta'kidlaganidek, har bir ko‘tarilgan masala ortida inson taqdiri yotibdi. Shu bois, barcha murojaatlar ijrosi qat’iy nazorat ostida bo‘ladi va bosqichma-bosqich hal etib boriladi.