Oziq-ovqat xavfsizligi va narxlar barqarorligi – bugunning dolzarb masalasi

🇺🇿 Xalq deputatlari Uchtepa tumani Kengashi deputatlarining 24 talik tavsiyalari bo‘yicha biriktirilgan vazifalar ijrosi doirasida O‘zbekiston Ekologik partiyasidan saylangan "2-Hamkor" okrugi deputati Abdulayeva Kimyo Adilovna tumandagi Farhod dehqon bozorida bo‘lib, bozordagi savdo sharoitlari, mahsulotlar sifati, laboratoriya faoliyati hamda aholi iste’moli uchun zarur mahsulotlar narx-navosini o‘rgandi.

📊 O‘rganish davomida bozorda sotilayotgan go‘sht, baliq, sut va sut mahsulotlari, qandolat mahsulotlari, tayyor salatlar hamda boshqa tez buziladigan oziq-ovqat mahsulotlarining saqlanish holati, sifati va xavfsizlik talablari asosida realizatsiya qilinishi yuzasidan monitoring olib borildi. Shuningdek, bozor hududida faoliyat yuritayotgan laboratoriya ish jarayoni, mahsulotlarni veterinariya-sanitariya ekspertizasidan o‘tkazish tartibi va berilayotgan xulosalarning sifati bilan yaqindan tanishildi.

🗂 Ta’kidlash joizki, bozorlarda tez buziladigan mahsulotlarni sotish va saqlash tartibi O‘zbekiston Respublikasi Vazirlar Mahkamasining 253-sonli qarori bilan tasdiqlangan “Bozorlarda savdo qilish qoidalari” hamda amaldagi sanitariya me’yorlari va qoidalari (SanQvaN) asosida tartibga solinadi. Mazkur talablarga muvofiq, tez buziladigan mahsulotlar faqat sovitish va muzlatish uskunalari bilan jihozlangan rastalarda saqlanishi va sotilishi, mahsulotlarning yaroqlilik muddati hamda sifat ko‘rsatkichlari ustidan doimiy nazorat olib borilishi lozim.

🕯 Monitoring jarayonida bozorda aholi iste’moli uchun eng zarur bo‘lgan oziq-ovqat mahsulotlarining yetarliligi, narx-navolar barqarorligi va xaridorlar uchun yaratilgan sharoitlar ham atroflicha o‘rganildi. Savdo rastalarida mahsulotlar assortimenti, sifat darajasi hamda sanitariya talablariga rioya etilishiga alohida e’tibor qaratildi.

📈 Shuningdek, oziq-ovqat mahsulotlari bilan ishlovchi sotuvchilarning maxsus sanitariya kiyimlarida faoliyat yuritishi, tibbiy ko‘riklardan o‘z vaqtida o‘tganligi va sanitariya daftarchalarining mavjudligi ham ko‘zdan kechirildi.

🗣 O‘rganish yakunida oziq-ovqat mahsulotlari xavfsizligini ta’minlash, sanitariya qoidalariga qat’iy rioya etish, bozorlarda sifatli mahsulotlar savdosini yo‘lga qo‘yish hamda narx-navolar barqarorligini saqlash, aholi manfaatlarini himoya qilishning muhim omillaridan biri ekanligi ta’kidlandi.