Aldın xabar bergenimizdey Rayonlıq Kámbaǵallıqtı qısqartıw hám bántlikke kómeklesiw bólimi tárepinen sessiyaǵa usınılıp atırǵan esabatları hám ámelge asırılıp atırǵan jumıslar menen tanısıw maqsetinde orınlarǵa shıǵıp úyreniw jumısları alıp barılmaqta.

Xalıq deputatları Bozataw rayonlıq Keńesi deputatları Sh.Berdaxov hám G.Yusupovalar tárepinen aymaqta jasawshı kámbaǵal shańaraqlardıń turmıs jaǵdayların úyreniw jumısları alıp barıldı. Úyreniw dawamında shańaraq aǵzalarınıń sociallıq jaǵdayı, turmıs sharayatı, jumıspenen támiyinleniw dárájesi hám olardı qollap-quwatlaw boyınsha ámelge asırılıp atırǵan ilajlar menen tanısıldı.

Deputatlar shańaraq aǵzaları menen sáwbetlesip, olardı qızıqtırǵan máselelerdi tıńladı hám kóterilgen múrájatlar boyınsha tiyisli shólkemlerge usınıslar beriw belgiledi. Sonıń menen birge, shańaraqtı sociallıq qollap-quwatlaw, materiallıq járdem kórsetiw hám turmıs sharayatın jaqsılawǵa qaratılǵan jumıslar boyınsha tiyisli máseleler úyrenildi.

Deputatlar tárepinen bunday úyreniwlerdiń tiykarǵı maqseti – xalıqtıń turmıs sharayatın jaqsılaw, olardıń múrájatların orında úyreniw hám ámeliy járdem kórsetiw arqalı sociallıq qollap-quwatlawdı kúsheytiwden ibarat ekenligi atap ótildi.