Fuqarolar murojaatlari deputatlik nazoratiga olindi.

Xalq deputatlari Qiziltepa tumani Kengashi raisi U. Bobojonov, 1-Malikobod saylov okrugidan saylangan tuman Kengashi deputati G‘. Safarov hamda mutasaddi tashkilotlar vakillari ishtirokida O‘zbekiston va Furqat mahallalari fuqarolari bilan uchrashuv o‘tkazildi.

Ochiq muloqot davomida fuqarolar tomonidan hududdagi dolzarb masalalar yuzasidan taklif va murojaatlar bildirildi. Xususan, mahallalar hududida havoga taralayotgan noxush hidlar aholini jiddiy tashvishga solayotgani, bu holat turmush sifati va ekologik muhitga salbiy ta’sir ko‘rsatayotgani ta’kidlandi.

Mazkur masala yuzasidan fuqarolardan ko‘plab murojaatlar kelib tushdi. Uchrashuv yakunida noxush hidlarning kelib chiqish sabablarini aniqlash hamda ularning oldini olish bo‘yicha amaliy choralar ko‘rish maqsadida deputatlik so‘rovlari tayyorlanib, tegishli tashkilotlarga yuborilishi belgilandi.

Bildirilgan murojaatlarning ijrosi deputatlik nazoratiga olinib, masalaning ijobiy yechim topishi yuzasidan tegishli ishlar olib boriladi.